Kombîyayîşê Îdareyanê Herêmîyan: Çîyo ke ê ma yo ma do bigêrê

Hetkarê Hemserekê Heyetê Îdareyanê Herêmîyan ê Demokratîkan ê HDPyî Tîryakîyî vat: ''31ê adara 1999î ra nata çîyo ke ê ma yo, ma do apey bigêrê.''

Îdareyanê Herêmîyan ê Demokratîkan ê HDPyî kombîyayîşê xo Salona Konferansî ya Şaredarîya Silopî de kerd.

Hetkarê Hemserekê Heyetê Îdareyanê Herêmîyan ê Demokratîkan ê HDPyî Mehmet Ruştu Tîryakîyî kombîyayîş de qisey kerd.

Tîryakîyî bale ante rejîmê qeyûman ser û vat: ''6 serrî yo dest nîyeno heqê temsîlkaranê şarê ma ser. La senî ma 31ê adare de kerd ma do reyna 31ê adara 1999î ra nata çîyo ke ê ma yo, ma do apey bigêrê. Ma do weçînayîşanê 2023 û 2024î de zî ser bikewê. No îqtîdar do nêeşko bibo îradeyê şarî. Îqtîdar pê kerdişanê xo keno ke şaredarîyanê ma krîmînalîze bikero la do nêeşkno. Ma rejîmêkê faşîstî de têrî yenê ke îradeyê şarî bi temamî çin hesibneno. Ma do nînan sîndoqan de bin bivisnê.

Zîndanan de vera tepişteyan bêhuqûqîyê pîlî est ê. Her hewte tepişteyê sîyasî yenê qetilkerdene. Îqtîdar şerê gonînî keno. Bi teyarayanê THYyî cergan beno Lîbya û uca ra zî derbazê Armenîstan û Azerbaycanî keno. No îqtîdar bi xo rejîmê Îmraliyî yo. Heta ke rejîmê Îmraliyî nêqedo Rojhelatê Mîyanênî de berê haştîye anêbenê. Heta ke tecrîdê Îmraliyî dewam bikero Rojhelatê Mîyanênî de şer do dewam bikero. Ma eşkenê sey şarî nê hêrişanê vera Rojawanî zî vindarnê û ser bikewê.Ma ganî îşxalî rê vajê ney.

No îqtîdaro ke dewamê Darbeya 12ê Êlule yo ma eşkenê bi amadekarîyanê xo yê weçînayîşî ey bin bivisnê. Ganî ma xebatanê xo yê weçînayîşî biqedînê. Eke ma wazenê tarîyan roşnî bikerê û HDPyî pîl bikerê. Potansîyel û hêzê ma est o ke ma do xeyalanê xo bîyarê ca.''