Komîteya Xebatanê Şehîdan a PKKyî derheqê şehîdanê menga gulane de eşkerayîyêka nuştekîye weşanîyaye û vat: ''Destpêk de şexsê embaz Mehmet Karasungur û Îbrahîm Bîlgînî de ke 2ê gulana 1982î de netîceya xeta xîyanet û  komplogere ya ke kolonyalîstî komelê Kurdîstanî  de sey birînêkî ci ra gonî yena tim aver benê de şehîd bîyî ma pêro şehîdanê menga gulane bi heskerdiş û mînetî yad kenê. Ma do hesabê birînanê înan bingeyê serkewtişî de kolonyalîstan û hemkaranê ci ra bipersê.

Têgêrayîşê Azadîye yê Kurdîstanî pê destkewteyanê gonîya 40 hezar şehîdan resa nê rojan û ewro zî têkoşînê gerîlayan dewam keno. Çunke PKK partîya şehîdan a. Çar parçeyanê Kurdîstanî de têkoşînêko bêaman yeno kerdene. Hesabê gonîya şehîdanê ma yeno perskerdene. Rayber Apo û PKK pêro têkoşînê xo goreyê na raştîye kenê. Naye ra aya ke Têgêrayîşê PKKyî kena raştîya şehîdan de yena dîyene.

Îqtîdaro faşîst ê AKP-MHPyî nika qels beno. Rejîmo faşîst ê AKP-MHPyî dişmenîya vera kurdan de sînoran nêşinasneno, vera merdimîye plananê bêexlaqan keno. Qanûnê şerî de cayê hêrişê vera cenaza û goristanan çin o. La eke babete Têkoşînê Azadîye yê Kurdîstanî biba rejîmo faşîst pêro metodanê gemarinan xebitneno.

Hêrişê îqtîdarê AKPyî yê vera şehîdgehanê Êlih, Çewlîg, Wan û Geverî sey mîsalêk verê çiman de yê. Ganî keye û şarê ma baş bizano ke rejîmo faşîst ê AKP-MHPyî Têkoşînê Azadîye yê Kurdîstanî ra zaf terseno coka nê hêrişan keno. Nê hêrişê vera şehîdgeh û cenazayanê şehîdan qelsîya dişmenan nîşan danê. Texrîbkerdişê şehîdgehan nêno qebulkerdene. Bêhurmetîya vera şehîdgehan bêhûrmetîya vera merdimîye ya.

Wayîrvejîyayîşê şehîdan wayîrvejîyayîşê merdimîye yo. Ganî hesabê naye bêro perskerdene, ma do nêverdê ke dest bêro dayene fîrazîyanê ma. Wayîrvejîyayîşê embazan û domananê înan wezîfeyê ma yo verên o. Ma dormeyê vîrameyîşanê şehîdanê xo de bibê yew û ma paştî bidê înan, ma barbarîya dişmenan vindarnê, welatêkê azadî awan bikerê.

Xoverdayîşê keyeyê embazê ma Egîd Îpeko ke cenazaya ci pê kargo erşawîyaye û nobeta gorî ya dadîya Sevda Serînyela ke vera gorê ci hêriş ame kerdene zaf ercîyaye yê. Ganî çalakîya Dayîke Hakîfe Serînyel têna nêra veradîyene. Çîyo ke tewr zêde dişmenan tersneno hêzê şarî yo. Coka ganî her wext înan rê paştî bêro dayene, têkoşînê şehîdanê ma bêro berzkerdene. Ganî keyeyê şehîdanê ma her wextî ra zêdêr wayîrê şehîdanê xo bivejîyê.

Ma sey Komîteya Xebatanê Şehîdan reyna anê ziwan ke wayîrvejîyayîşê erjanê ke Têgêrayîşê Azadîye awan kerdî, xurtkerdişê têkoşînî wezîfeyo esas o. Ma şehîdanê menga Gulane reyna bi heskerdişî û mînetî yad kenê; sozê xurtkerdişê têkoşînî danê.''