Komîteya Weşîye ya KCKyî derheqê hêrişanê kîmyewîyan ê dewleta tirke ya îşxalkere de eşkerayîyêke daye. Eşkerayîye wina ya:

''Artêşa tirke bi serran o vera gerîlayanê azadîye çekanê kîmyewîyan şuxilnena. Tewr peyên 17 gerîlayê azadîye netîceyanê hêrişanê kîmyewîyan de şehîd bîyî û naye ser o dîmenê tay şehadetan ameyî parekerdene. Nêrazîbîyayîş û eşkerayîyê ke parekerdişê dîmenan ra dima dîyayê, rewşêka wijdanîye îfade kenê.

Nê hêrişê ke bi fermanê Erdoganî hetê artêşa tirke ra yenê kerdene, sûcê şerî û sûcê vera merdimîye yê tewr pîlî yê. Eşkerayîya Sereka TTByî Şebneme Korur Fîncanci ya ke vera nê hêrişan vengê xo veto, eşkerayîyêka qedirgiran û manadar a. Şebneme Korur Fîncanci vat: 'Nê gazê kîmyewîyî sîstemê sînîrî kenê hedef û rixmê ke qedexe yê şuxilîyenê. Ganî heyetê xoserî herême de cigêrayîşî bikerê ke Peymana Cenevre ya vera çekanê kîmyewîyan de krîterê ci yenê vatene.' Erdogan seba ke verê ney bigêro, wijdan û vengê merdiman bêveng bikero derheqê aye de bira tehqîqatî girewte. Ma nê tehqîqatî şermezar kenê.

Şebneme Korur Fîncanci pisporêka tipê edlî ya namdar a û zanyarêka qedirgiran a. A pawitoxêka heqanê merdiman a ke bi serran o raştîye qîrena. Şebneme Korur Fîncanci tim hetê ciwîyayîşî û ciwînayîşî de bîye, peyê raştîye de şîye û raştîyê zanistî ardî ziwan. Ganî sere de kedarê weşîye, doktori zanyar û demokratî pêro merdimî vera hedefmojnayîşê hukmatê faşîstî yê Erdoganî vinderê û tewirê xo bimojnê. Şebneme Korur Fîncanci vengê wijdan û merdimîye yo. Wayîrvejîyayîşê nê vengî û wijdanî wayîrvejîyayîşê rûmetî yo.

Ma venga ê kesanê ke hetê ciwîyayîş û ciwînayîşî de yê, û merdimanê wayîrwijdanan danê ke vera şuxilnayîşê hêrişanê kîmyewîyan vengê xo vejê û vera nê hêrişan çalakîyan bikerê.''