Komîteya Zindanan a PKK-PAJK'î derheqê rojeyê mergî û grevê vêşanîye de eşkerayîyêka nuştekîye weşanaye.

Eşkerayîye de ame vîrardene ke, xoverdayîşê grevê vêşanîye yê bêdem û bêagêrayîşî 6'ê Teşrîna Peyêne 2018 de bi serkêşîya Hemsereka KCD'yî û Parlamentera Colemêrgî Leyla Guvene zîndanê Amedî de dest pêkerd û ame vatene,”Waştişê tekane wedaritişê tecrîdî yo ke şexsê Rayberîya ma de serê şarê Kurdî de yeno kerdene û binkerdişê faşîzmî yo. Leyla Guvene vat, ‘Zerrî û hişê mi tu cara tecrîdkerdişê Rayberîye qebûl nêkerd’ û serewedarit. No xoverdayîş grube bi grube vila bi û hepisxaneyanê Kurdistan û Tirkîya de veng da. Mîyanê zîndanan ra zî vejîya pêl bi pêl temamê dinya ra bi vila.”

Xoverdayoxan heme kayî pûç vetî

Komîte ard vîrî ke, bi hezaran girewteyê dewaya PKK û PAJK'î şeş mengî yo seba wedaritişê tecrîdkerdişê Rayberê Şarê Kurdî Abdullah Ocalanî grevê vêşanîye yê bêdem û bêagêrayîşî de yê û ard ziwan , “Dewletê bi zext, deb û dolaban cehd kena ke xoverdayîşî bin bikero, labelê xoverdayoxî bi qerardarîya xo ya girde cehdkerdişanê dewlete pûç kenê.”

Eşkerayîye da zanayene, 30 girewteyê ke zîndanan de 30'ê Nîsane û 10'ê Gulane de grevê vêşanîye bedilna rojeyê mergî ke tewirê tewr giran ê çalakîyan o û bi qerardarîya xo ya girde nîşanê her kesî danê.

Qerarê rojîyê mergî yê tarîxkî do qetî ser bikewo

Eşkerayîye da zanayene, çalakîya rojîyê mergî gêrayîşê azadîye yê şarê Kurdî, şaranê bindestan û merdimîye de qerar û prosesêkê tarîxkî yo û ame vatene, “Senî ke Xoverdayîşê Zîndanê Amedî yê Mazlûm, Xeyrî, Kemal, Sara, Çaran vera faşîzmê 12'ê Êlule serkewtişêko gird ê îdeolojîk aferna û şarê ma resna nê serdemî, hemrayê zîndanan de yê bi na xete û ruhê 14’ê Temmuze xo ver ro danê, îradê, cesaret û qerardarîya înan do faşîzmê AKP-MHP'yî bin bikero, tecrîdî bişikno, faşîzmî birijno û azadkerdişê Kurdistanî de rolêko tarîxkî kay bikero. Seba naye zî qerarê rojeyê mergî yê tarîxkî, rayraşîyayîşo tarîxkî yê serê xeta serkewtişî ya mîlîtanîya fedayî ya PKK’yî ya ke qetî ser bikewo. Bi nê amancî, bi ney ra guman girewtiş, famkerdişê nê qerarê tarîxkî û bica nêardişê berpirsîyarîya nê qerarî, yeno manaya têkoşînî ra remayîşî.

Ê yê ke tewr baş xoverdayîşî fam kenê dayîkê Kurdan ê

Ê yê nê qerarî û xoverdayîşê tarîxkî tewr baş fam kenê, dayîkê Kurdan ê. Wayîrvejîyayîşê  Xoverdayîşê Zîndanî yê Gird ê Dayîkan, Kurdistan û Tirkîya de esaso bibingeyên, peyme, tewirê têkoşînê vera faşîzmî yo. Peymeyê bingeyênî yê merdimîye û wezîfeyê welatperwerbîyayîş, demokratbîyayîş û şorişgêrîye yê merdimî tewrê têkoşîn yo.

Hemleya xoverdayîşî ya ’Ma tecrîdî bişiknê, faşîzmî birijnê, Kurdistanî azad bikerê’, bi serkêşîya Grevê Vêşanîye û Rojeyê Mergî yê Girdî, serdestîya AKP-MHP’yî ya faşîste bin kerde. Çetekarîya Erdogan-Bahçelî baş vînena ke binkewtişî înan do xeylî gird bibo, coka seba ke cuya xo derg bikerê, bi her tewir hêrişanê faşîstan, deb û dolaban ra gêrênê. Tewrbîyayîşê dayîkanê Kurdan ê bi xoverdayîşê zîndanî, bimana, îrade û cesaretê tarîxkî yê cinîyan ê Kurdî, reaksîyonêkê qehremankî yo, pîroz o. Hêrişê çeteyanê faşîstan ê ke vera dayîkan yenê kerdene zî, goreyê rol û manaya xo ya tarîxkî, namerdî ya û netîceyê ters û biknkewtişî yo.”

Peynîya eşkerayîye de ame vatene, wayîrvejîyayîşê xoverdayîşê qehremankî dayîkan ê Kurdan, do peynîya tecrîdî bîyara û derba peyêne bida faşîzmî ro.Komîteya xoverdayîşê zîndanan, xoverdayîş û têkoşînê qehremankî yê dayîkan ê Kurdan silam kerd û vengdayîş bi her kesî kerd ke wezîfeyanê xo ra wayîr bivejîyê.