Merkezê Koordînasyonê Krîzî yo ke binê sîwana Kongreya Komelê Demokratîkî (KCD) de vera Korona ame akerdene, mesajêkê vîdeoyî erşawit. Hemsereka Pêroyî ya Partîya Herêman ê Kurdîstanî (DBP) Salîha Aydenîz nameyê Merkezê Koordînasyonê Krîzî eşkerayîyêke daye.

Aydenîze da zanayene ke hûmara nêweşanê Korona zêdîyena û ganî komel xo bipawo û tebdîran bigêro. Aydenîze vera hukmatî nêrazîbîyayîşê xo mojna û vat: ''Seba ke tebdîrî eşkera nîyî, bi hawayêkê têdûştî nêzîyê her kesî nêbenî qurban û nêweşî her roje zêdîyenê.''

Aydenîze venga komelî da ke goreyê pêşnîyazan û hîşyarîyanê merkezî têbigêrê. Aydenîze vat: '' Beno ke karê ma yo lezabez beno gereka ma şorê teber. La ganî çend destê ma ra bêro ma hende tay bivejîyo teber baş o. Seba merdimanê ke serra 65 ra pîlêr ê bira qedexeyê vejîyayîşê teberî esta. La her kes eşkeno pê na nêweşîye bikewo. Eke karê şima yo lezabez çinbo mevejîyê teber. Bi nê hawayî ma xo bipawê. Nê prosesê zorî de hewceyê ma pê paştdayîşî esto. Şarê ma heta nika dormeyê xo, cîranê xo têna nêverda Naye ra pey zî wa nêverdo.''