Serekê Komeleya Cugehî ya Wanî (ÇEV-DER) Alî Kalçikî bale atne ser ke janê Korona ke dinya girewto binê tesîrê xo pê destê merdiman ameyo kerdene û vat xoza qesasê xo gêna.

Kalçikî vat: ''Merdimî semedê wayîrbîyayîşî hêrişê xoza kenê. Hewceyê xo ra zafêr kenê pêser. Sîstemo kapîtalîst semedê karê xo sînor nas nêkeno û xoza texrîp keno. Hêzê serdestî qirkerdişê xoza xo rê sey heqêk vînenê. Bajarî açarnayî kerra û bi nameye bajarîkerdişî nêverdenê ganîyî nefes bigêrê.

Semedê rantî warê cuya feda kerdî û warê citkarî talan kerdî. Daristanî çîn kerdî. Her hetê dinya de santral û termîkê nukleerî awan kerdî. Enerjîyê sey tije û va nêvînayîşî ra ameyî dîyene. Dinya de hewa bedilya, cemedî helîyayî her çî kewt têmîyan.  Nika ne zimistan sey verî yo nê zî hemnan. Binateyê hamnan de torge varena. Yew hetî ra huşkîye hetê bînî ra laserî.

Darî birîyayî, awî peysayî, maseyî qedîyayî. Senî ke şefê Kizildereyijî vato 'hela ke dara peyêne birîyaye, awa peyêne peysaye, maseyo peyêne tepişya do bêro famkerdene ke dolaro hewz nêwerîyeno la do zaf erey bo'. No janê Korona ma pê destê xo aferna. Seba ke ma ganîyan rê zulm kerd û xoza talan kerd no jan vejîya werte. Vîrus qesasê xoza gêno.''