Têgêrayîşê Dostîye yê Mabênê Şaran ê  Vera Nîjadperestîye  (MRAP) çarçewaya  Roniştişanê Heqanê Merdiman ê  56. yê Neteweyanê Yewbîyayeyan (NY)  ê ke 18ê hezîrane de dest pêkerd û heta 12ê temuze do dewam bikerê, bi sernameyê ''Tirkîya de heqê merdiman'' konferansêk organîze kerd û bale ante rewşa Rayberê Şarê Kurdî Abdullah Ocalanî ser.

Endama Meclîsê Temsîlkaran ê Îspanya, Senatora Katalan û Emdama Meclîsê Parlamenteran ê Konseya Ewropa Laura Gastel Forta ke sey qiseykerdoxe tewrê konferansî bîye, Ajansê ma rê tecrîdê Îmraliyî erjna.

Laura Castel Fort ard ziwan ke şertê tecrîdê Îmraliyî goreyê huqûqî nîyê û nê vatî: ''Îmrali de rejîmê tecrîdî ameyo ronayene û hukmatê Tirkîya rejîmê îzolasyonî yo.  Ma xebatanê xo yê verênan de zî eşkera dî ke Birêz Ocalan îşkenceyê giranî dir rî bi rî yo. Tecrîdo sey tecrîdê Îmraliyî dinya de çîn o. Serrannê 1970-80yan de Guatemala de zî tecrîdo winayên nêame vînayene. Ê wextan de zî tepişteyan reyde tekîlî bibî. La Birêz Ocalanî ra qet xebereke nîna girewene.

Birêz Ocalan binê îşkenceyê giranî de yo. No binpaykerdişê heqanê merdiman o ke ganî vera ci  bêro vejîyayene. Vera binpaykerdişê heqan bêvengmendiş yeno manaya paştdayîşê îşkenceyî. Dezgehê sey Konseya Ewropa û Neteweyanê Yewbîyayeyan vanê ê vera binpaykerdişê heqanê merdiman ê la meseleya Abdullah Ocalanî de hema bêveng ê. No zî dirîyîya dezgeh û dewletan mojneno ra.''