Hêrişê îşxalî yê dewleta tirke yê vera Başûrê Kurdîstanî bi hemkarîya PDKyî dewam kenê. Tornê Şêx Seîdî û hemşaredaro verên ê Xinûsî Hasan Basrî Firatî ke ANFyî rê rewşe erjnaye vat seba ke PDK û keyeyê Barzanî paştî danê dişmenî ganî heme şarê kurdî û partîyê ci yê sîyasîyî vera înan tewirê hemparî bîgêrê.

Hasan Basrî Firatî vistvîrî ke dewleta tirke bi xo tim vana a dişmena kurdan a û nê vatî. ''Dewleta tirke ronayîşê xo serê înkar û îmhayê kurdan na ro. Şarê kurdî vera nê înkarî seserrî yo xover dano la PDK xizmetê dişmenî keno.  Şarê kurdî 40 serrî yo serkêşîya Têgêrayîşê Azadîye yê Kurdîstanî de têkoşîn keno.  Gama ke Başûr de sîstemo federal ame ronayene heme kurdî bîyî şa. Ma vat qey ma sey kurdan nê sîstemî ra feyde kenê la ma vînenê ke destkewteyî semedê dişmenanê kurdan yenê şuxilnayene. 

Herra xo dişmenê kurdan rê akerda. Ca dayo dewleta tirke. Dewleta tirke tewr zaf zî dişmenê înan a.  Semedê çînkerdişê PKKyî dişmenê xo reyde îtîfaq kerdo. Seba ke dewleta tirke PKKyî îmha bikero, ci rê rayîr akerdo, destûr dano wa qereqol virazo, her qeyde hetkarîye keno. Dewleta tirke ûca îhlak kena. Ziraro tewr zaf ê do bîvînê. Ganî keyeyê Barzanî na xeletîye ra agêro. Dewleta tirke eşkera kurdan rê dişmenîye kena. Ma reyna veng danê keyeyê Barzanî, hinî bes o xizmetê dişmenî mekerê. Dişmen kurdan cîya nêkeno wazeno pêrune qir bikero.''