Roniştişanê Heqanê Merdiman ê  56. yê Neteweyanê Yewbîyayeyan (NY)  ê ke 18ê hezîrane de dest pêkerd û heta 12ê temuze do dewam bikerê, Ofîsê NYyî yê Cenevre de dewam kenê.

Çarçewaya nê roniştişan de hetê Têgêrayîşê Dostîye yê Mabênê Şaran ê  Vera Nîjadperestîye  (MRAP) ra bi sernameyê ''Tirkîya de heqê merdiman'' konferansêk ame kerdene.

Konferans de rewşa Rayberê Şarê Kurdî Abdullah Ocalanî û caardişê bêhuqûqîye yê  dewleta tirke yê Kurdîstan ameyî destgirewtene. Avûkatê Abdullah Ocalanî Îbrahîm Bîlmez, Wekîla Parlamentoya Ewropa Laura Castel Fort û sîyasetmedarê kurdan Firat Anli sey qiseykerdoxî tewrê konferansî bîyî. Temsîlkarê MRAPî Gianfranco Fattorini moderatorîya konferansî kerd.

Laura Gastel Forta ke verî qisey kerd, bale ante bêhuqûqîya dewleta tirke ser û vat bi hezaran endamê HDP û DEM Partî bîlasebeb zîndan de yenê tepiştene. Gastel Fort ard ziwan ke hedefê hêrişanê vera kurdan û muxalîfan de tecrîdkerdişê Abdullah Ocalanî est o û vat: ''Ocalan eynî wextî de aktoro esasî yê çareserîya meseleya kurdan o.'' Laura Castel Fort veng da NYyî sere de tecrîdê Îmraliyî wa vera bêhuqûqîya Tirkîya selahîyatê xo bişuxilno.

Îbrahîm Bîlmezî  zî bale ante tecrîdê serê Rayberê Şarê Kurdî Abdullah Ocalanî ser û vat Îmrali de qet huqûqêk nîno caardene. Bîlmezî derheqê bêhuqûqîyan de zanayîş da û vat: ''Mehkemeya Heqanê Merdiman a Ewropa û dezgehê eleqedarî yê bînî ke dewleta tirke rexnê kenê û derheqê ci de qeraran genê peyê qeraranê xo de nêvindenê, nêşine Tirkîya ser. Coka Tirkîya huqûqê zereyî û mîyannetweyî binpay kena. Ganî Konseya Heqanê Merdiman a NYyî û dezgehê bînî vera bêhuqûqîya Îmrlaiyî têbigêrê.''

Firat Anliyî zî bale ante caardişanê qeyûmî yê  îqtîdarê AKPyî ser û vat: ''Vera heme erjanê şarê kurdî hêriş yeno kerdene.  Bi hêrişanê vera Rojawan û Herêmanê Pawitişî yê Medya zî yeno waştene ke destkewteyê kurdan destê înan ra bêrê girewtene.''