Leşkerê tirkî yê îşxalkerî çarçewa hêrişanê îşxalî de herêmanê Besta, Gabar, Cûdî û Namazî yê Şirnexî de bêmabên xoza wêran kenê, daran birnenê. Qoricîyê ke bajarekanê Sêgirkê û Hîlalî yê Qilabanî ra ver bi Besta şîyê, herêma Tikera de binê çimdarîya leşkeran de daran birnenê.

Qoricîyî Mahmût Babat, Kazim Babat û Suleyman Babat ê ke Besta de 'îhaleya' birnayîşê daran girewta, qoricîyanê xo reyde tedaya dewijan kenê ke wa tewrê talanê xoza bibê.

Goreyê agahîyan herêma Tîkera de rojane bi 300 tonî darî birîyenê, bi traktoran yenê berdene bi warêkê nêzdîyê bajarekê Sêgirkê. Darê ke birîyenê dima hetê Mahmut Babat, Kazim Babat û Suleyman Babatî ra roşîyenê.