Licê de dewijan rê ajanîye yena ferzkerdene

Qezaya Licê ya Amedî de dewanê Dêrxus, Huseynîk û Karahasanî de 14ê nîsane de operasyonêk dîya destpêkerdene. Dewije Remzîye Sonsuz pare kerd ke 2 rojan tira ajanîye ameye ferzkerdene.

Qezaya Licê ya Amedî de dewanê Dêrxus, Huseynîk û Karahasanî de 14ê nîsane de artêaşa tirke ya îşxalkere operasyonêk dabi destpêkerdene. Deweka Goma Xejîkan a Karahasanî de dewije Remzîye Sonsuz rê 2 rojî xeberêke nêameye girewtene.

Remzîye ard ziwan ke warê pêkewtişî keyeyê ci ra kîlometreyêk dûr o û wextê pêkewtişî de îstîxbaratî ameyî deweka înan. Remzîye vat: '' Îstîxbaratkeran pê zorî keye de cigêrayîş kerd, ma rê vat 'Şima terorîstan weye kenê.' Mi vat eke destûrê înan çin o nêeşkenê cigêrayîş bikerê. Înan mi rê vat 'eke zerarêk bireso leşkeranê ma gureyê şima dîyeno ci.' Înan di rojan dormeyê herême girewt, ma rê gef wend û ma rê ajanîye ferz kerde. Înan waşt numareyê xo yê telefonî bidê mi la mi qebul nêkerd. Mi înan rê vat 'ez rûmetê xo nêroşena.' ''

Remzîye da zanayene ke leşkeran şiwanêk destbend kerd û ci rê îşkence kerd. Remzîye vat: ''Leşkeran şiwan berd peyê keyeyê ma û o derb kerd. Şiwan dima vera dîya û vat leşkeran kard na qirixê ci, ey rê gef wendo.''

Remzîye eşkera kerd ke hetê Dêrxusî de leşkeran pêro darî birnayî.

Hetê bînî ra Wekîla HDPyî Remzîye Tosun 3 dewî zîyaret kerdî û vat: ''Ma şîyî deweka Pênavî ya dewa Dîbekî. Wextê operasyonî de  dewijan rê zaf neheqîye ameye kerdene, şiwanî ameyê rûtkerdene û destbendkerdene. Herême de pêro keyeyî gêrîyayî binê ablûqa.''