'Ma do meverdê dişmen nefes bigêro'

Fermandaranê HPGyî ra Dagistane Întîkam vat: ''Heta ke ma ra yew zî bimano/e ma do meverdê ke erdê fîrazî yê Kurdîstanî de dişmen rehet nefes bigêro.''

Fermandaranê HPG û YJA-Starî derheqê hêrişanê îşxalî yê artêşa tirke yê vera Zap û Avaşînî de ANFyî rê qisey kerd.

Fermandaranê YJA-Starî ra Sozdare Evîn ard ziwan ke serra 2022yî ra nata safhayêka newîye dest pêkerde û artêşa tirke bi her hawayî hêrişê Kurdîstanî kena. Evîne vat: ''Ma zanenê ke embazî Zap de senî şer kenê. Dişmen nika bi zelalî vera embazanê ma çeka kîmyewîyew şuxilnena. Wexto ke ma da Skorskyî ro, dişmenî no nimna. Ma dî ke ê senî pê qîrayîşî remayî. Gerîlayê Zapî dişmenî hol şinasnenê, goreyê ney amadekarîya xo kenê û wina şer kenê. Ma zî çalakîyanê embazanê xo ra moral gênê. No şer şerêko fîraz o û hêrişanê barbaran, îxanet û komplogeran do çin bikero. Serkewtiş do ê ma bibo.''

Fermandaranê HPGyî ra Cemal Erdalî vat: ''Eke ma eşkenê vera dişmenî têkoşînêkê xurtî bikerê no xêrê şehîdan ra yo. Ma wazenê mîrasê şehîdan pê serfîrazîye tacîdar bikerê. Têkoşînê Zap, Avaşîn û Metîna çimeyê xo ney ra gêno. Nika ma Zap, Avaşîn û Metîna de têkoşînêkê xurtî kenê û nêverdenê ke dişmen tîya de ca bido xo. Kurdîstan erdêko fîraz o. Dişmen wazeno Kurdîstanî bênasname û bê kultur verdo. Hêrişî kamî ra yenê wa bêrê, çend giran benê wa bibê, kamyew asta de teknolojîya înan aver biba zî gerîlayê azadîye û xeta Apogîre do rayîr medê îşxalê Kurdîstanî.''

Fermandaranê HPGyî ra Dagistan Întîkamî vat: ''Dewleta tirke 6 serrî yo Efrînî ra heta Zagrosan hêrişanê giranan kena. La nêeşkena netîce bigêra. Nika dewlete tîya de teng bîya. Wa yar û neyar hol bizanê ke heta ke ma ra yew zî bimano/e ma do meverdê ke erdê fîrazî yê Kurdîstanî de nefes şêro dişmenî. Avaşîn û Zap de dişmen do bin şêro. Eke dişmen ser bikewo armancê ci îşxalê pêro Başûrê Kurdîstanî yo. Ganî şarê ma yê Başûrî goreyê ney têbigêro.''