Rojnamegeranê cinîyan ê Kampa Multecîyan a Şehîd Rustem Cûdîyî (Mexmûr) serrgêra diyîne ya şehadetê şehîdê çapemenîya azade Rizgar Denîzî de o yad kerd.

Nupelda Amed vat: "Bi serran şarê kurdî vera tedaya dewleta tirke xoverdayîşêkê bêhempa danê. Şehîd Rizgar zî xoverdayoxêk o ke bi kamera û pênusa xo xo ver da û şehîd bi. Ma soz danê ke me do pênus û kameraya Şehîd Rizgarî erdî de nêverdê."

Hîlale Rizgar vat: "Rizgar Denîz merdimêko birehm û zerrîpak bi. Domanan de doman, pîlan de pîl bi. Kampe de zaf ameyêne heskerdene. Ma do rayîrê Rizgar Denîz taqîb bikê. Ganî şarê kurdî wayîrê rojnamegeranê xo bivejîyê."

Leyla Oremar vat: Ma Rizgar Denîz û pêro şehîdanê çapemenîya azade bi rêzdarî yad kenê. Ma soz danê ke ma do taqîbkerê rayîrê înan bê."

Rizgar Denîz Kam o?

Rizgar Adanmiş 19ê sibata 1991î de şaristanê Sêrtî yê Vakurê Kurdîstanî de mîyanê keyeyêkê welatperwerî de ame dinya. Keyeyê Rizgarî barbarîya dewleta tirke dîye. Serra 1996î de koçê Başûrê Kurdîstanî kerd û keyeyî peynî de Kampa Şehîd Rustem Cûdîyî yê Mexmûrî de ca da xo. Muxabîr Rizgar Denîzo ke seba ke vengê şarê xo biresno dinya Mexmûr, Başûrê Kurdîstanî, Şengal, Herêmanê Pawitişî yê Medya, Rojawan, Vakurê Sûrîye de muxabîrtîye kerde. Dima ke QSDyî rojhelatê Dêra Zore de 9ê êlula 2017î de hemleya Vagerê Cizîrî da destpêkerdene, Rizgarî bi israran verê xo da herêma Dêra Zore. Wexto ke 12ê teşrîna verêne de hemwelatîyê sivîlî ver bi herêmanê xelisnayeyan şîyêne û bi hemkarîya şerwananê QSDyî xo cerganê DAÎŞî ra xelisnayêne muxabîrê ANHA Dilîşan Îbiş, Hogir Mihemed û Rizgar Denîz seba ke rewşa koçberan taqîb bikê verê xo da rayîrê Xerafî yê mabênê Dêra Zore û Hesekê. Tîya de cerganê DAÎŞî wesayîtêko bombaberkerde teqna û netîce de muxabîra ANHA Dilîşane Îbîş şehîd kewte û Hogir Mihemed û Rizgar Denîz zî birîndar bîyî. 14ê teşrîna verêne de zî Hogir Mihemed birînê xo ra şehîd kewt. Xoverdayîşê 70 rojan ra dima 18ê kanûna 2017î de zî muxabîr Rizgar Denîz birînê xo ra sebeb şehîd kewt. Xo dima de zî têkoşînê cigêrayîşê raştîye verda.