‘Ma do serê rêça hemraye Sema de bibê’

Endama KJK'yî Rojda Sîwereke, Sema Yuce ya ke 17'ê Hezîrane 1998 de şehîd kewte yad kerde û vat, “Çalakîya Sema Yuce tesîrêko gird serê şarî de kerd. Ma zî serê rêça hemraye Sema de yê.”

Sema Yuce 21'ê Adare 1998 de Hepisxaneyê Çanakkaleyî de, Newroze de bedenê xo da verê adirî û 17'ê Hezîrane 1998 de şehîd bîye.

Endama Komîteya Perwerdeyî ya KJK'yî Rojda Sîwereke bi wesîleya serrgêra şehadetê Sema Yuce ANF'yî re qisey kerd. Sîwereke bale ante serê tewrbîyayîşê cinîyan ê mîyanê partîye û vat, “Senî ke Rayberîye vana, PKK partîya cinîyan a. Wexto ke PKK vejîya werte tewrbîyayîşê cinîyan kêm bi, labelê dimayo ke PKK û Rayberîye ameyî naskerdene bi hezaran cinîyî tewrê mîyanê refanê gerîlayan bîyî.  Înan ra yew cinîya ke tewrê partîye bîya zî hevale Sara bîye. O wext hûmara înan xeylî kêm a, labelê netîceyê kede û cehdkerdişê înan bi hezaran cinîyî tewrê mîyanê refê partîye bîyî.

Serranê 1990 de vera zulmê dewlete Zekîye Alkane Amed de bedenê xo da verê adirî. Hevale Sema Yuce ya ke na çalakîye tesîr bi ci kerda tewrê partîye bîye. Hevale Sema herêma Serhedî ra ya. Her kes xoverdayîşê şarê herêma Serhedî zaneno. Hevale Sema wexto ke tewrê mîyanê refê partîye bîye unîversîte de beşê sosyolojîye wendêne. Hevale Sema dimayo ke tewrê mîyanê partîye bîye wareyê Rayberîye de mende. Rayber hevale Sema ra vano, ‘Eke ti bieşka xo bipawa to ra mîlîtanêka xeylî başe do biveja’. Hevala Sema seba ke na çarçewa de şer bikera agêraye welat.”

Cinîyî Timî Bîyî Serkêşê Cimatî

Rojda Sîwereke ard ziwan, Sema Yuce dimayo ke agêraye welat netîceyê komployêka girde de esîr ameye girewtene û vat, “Xoverdayîşê hemraye Sema yê zîndanî xora hetê her kesî ra yeno zanitene. Hevale Sema mîrasê xoverdayoxanê 14'ê Temmuze dewr girewt û çalakîya xo de xurt kerd. 8'ê Adare 1998 de vat, ‘8'ê Adare ra heta 21'ê Adare ez do pirdêk awan bikera’ û çalakîya xo viraşte. Çar mengî nêweşxane de ameye tedawîkerdene. Mîyanê çar mengan de nêweşxane de moral û motîvasyonê hevale Sema kêm nêbi.

Çalakîya Sema Yuce tesîrêko gird serê şarî de kerd. Ma zî serê rêça hemraye Sema de yê. Rayberîya ma timî cewab da şehîdan û têkoşîn gird kerd. Serranê 1996, 1997, 1998 de tewrbîyayîşê cinîyan mîyanê partîye de xeylî zêde bi. Nika zî têkoşînê YPJ, YJA-Starî dewam keno. Cinîyî her timî serkêşê cimatî yê. Ma reyna soz danê ke ma do girêdayîyê şehîdanê xo bimanê.”