Prosesêkê winasênî de ke hêrişê dewleta tirke yê vera kurdan dewam kenê mîyanê kurdan de zî nîqaşê yewîya neteweyîye zêdîyayî. Partîya kurdan ê Rojawanî verê cû pare kerdbi ke înan binê nameyê îtîfaqê neteweyî de dest pê xebate kerd.

Vakurê Kurdîstanî de zî partîyê kurdan 2 serran ra nata mîyanê îtîfaqê taktîkî de bîyî. 24ê teşrîna verêne de îtîfaqî asta stratejîke de xo mende kerd.

Beşdaranê îtîfaqî ra yew zî Partîya Herêman ê Demokratîkan (DBP) a. Hemsereka DBPyî Salîha Aydenîz derheqê babete de ANFyî rê qisey kerd.

Aydenîze vist vîrî ke hêrişê vera kurdan dewam kenê û vat: ''Seba ke destkewteyê ma destê ma ra nêşorê ganî ma înan bipawê. Nê prosesî de şarê ma û dormeyê kurdîstanîyî seba îtîfaqê neteweyî venga ma da. Ma bi nê hawayî îtîfaqê xo yo stratejîk kerd mende. Mîyanê kurdan de nakokî yan zî cîyakerî çin a. Şarê ma yo ke bedelê giranî dayî, wazeno keda ci zîl bida. Ganî ma mesuldarîya xo bîyarê ca. Çunke eke ma nêrê têkişt ameyoxê ma zî do destê ma ra şoro. Ganî hînî ma sey verî yewbînan sûcdar mekerê. Ma têna armanc kenê ke îtîfaqê neteweyî yê kurdan mende bikerê û mesuldarîyanê xo bîyarê ca. ''

Aydenîze bale ante girîngîya komkerdişê kongreya yewîya neteweyîye ser û vat: ''Seke zanîyeno formo ke Birêz Ocalan, Birêz Talabanî û Barzanîyî serra 2013î de ci ser o pêkerd, formê kongreya ma yo. Seba komkerdişê kongreya xo karê ma do dewam bikero. Bêguman komîsyonê îtîfaqî tecrubeyanê dinya ser o cigêrayîşan bikero û formulêkê hemparî bimojnê.''

Aydenîze peynîya qiseykerdişê xo de ard ziwan ke ê armanc kenê ke çar parçeyê Kurdîstanî de kongreyêka neteweyîye bikerê.