Fermandaranê Qerargehê Merkezî yê HPGyî ra Amed Malazgîrtî derheqê hêrişê dewleta tirke yê vera Herêmanê Pawitişî yê Medya û xoverdayîşê gerîlayan de ajansê ma rê qisey kerd.

Qiseykerdişê Malazgîrtî ra qismêk wina yo:

''Dewleta tirke hesa bkerd ke nê têgêrayîşê îşxalî yo ke nika herême de kena 2015 de  bikero. Coka vera warê Zagrosan Cîlo, Çaçela,Zap, Avaşîn û Xakurkê de hewa û erdî ra xeylêk operasyonî ameyî kerdene û pêkewtişê giranî qewimîyayî. Konseptê çokdayîşî yê dewleta tirke o wextî ra mende yo. La dewleta tirke o çax nêeşkaye vera xoverdayîşê gerîlayan şer bikewo. Dewleta tirke xeylêk rey waşt Başûrê Kurdîstanî de hêrişê xo yê îşxalî hîra bikero. Semedê naye  2015î ra heta 2018 Çarçela, Ertûş, Zap, Xeregol û Xakurkê de operasyonî ameyî kerdene la dewleta tirke rixmê heme îmkananê xo yê teknîkîyan û paştdayîşê çeteyan nêeşkeye vera gerîlayan şer bikero. Badê 2018î artêşa tirke NATOyî ra tekînê şerî yo newe girewt û 23ê nîsane de vera Avaşîn, Zap û Metîna bi hewayêkê hemwextî  têgêrayîşê hêrişî da da destpêkerdene. Nika hêrişî dewam kenê û bitaybetî Avaşîn yeno hedefgirewtene. Înan vat qey gerîlayî nêeşkenê vera nê teknîkî şer bikerê la xeletîyayî.  Embazê ma bi îradayê pîlî cewabê hêrişan  danê.''

Malazgîrt no hêrişo peyên sey hêrişêkê cîyayî hesibna û vat: ''Dewleta tirke nika pê heme îmkananê xo bi hewayêkê wehşîyî hêriş kena. Vera nê hêrişan têkoşîno tarîxî yeno dayene. Dişmenî wina hesab nêkerdbi. Bitaybetî Avaşîn de, Memreşo de sekêşîya Fermandar Serhed Giravî de derbeyê pîlî dîyayî artêşa tirke ro. Gama ke dişmenî dîye ke nêeşkeno xoverdayîşê gerîlayan bişikino dest pê metodanê leyminan kerd û Mamreşo de vera embazanê ma gazê kîmyewîyî şuxulnayî,7 embazê ma tîya şehîd bîyî. Dima ra seke yeno zanayene Dola Konferansî û Dola Maranî de derbeyê pîlî dîyayî dişmenî ro. Şikinayîşo verên artêşa tirke tîya dest pêkerd. Nê wird cayan de bi desan leşkerî ameyî kiştene. Coka artêşa tirke sey game bi game tay cayan ra xo peyser ante. Têkoşînê embazanê ma planê dewleta tirke pûç vetî. Eke dewleta tirke tîya bikewtêne ser herême Basya girewtene binê çemberî la embazanê ma destûr nêda. Dima ra 7ê hezîrane de hêrişê Werxelê kerd û pey ra verê xo da Girê Sorî. Tîya zî raştê xoverdayîşî ameye û çekê kîmyewîyî şuxulnayî.''

Amed Malazgîrtî wina dewam kerd: ''Artêşa tirke hêrişanê xo de çeteyan zî şuxulnena. Psîkolojîya leşkeran vera serûbin bîya. Çekê qedexeyî vera gerîlayan yenê şuxulnayene. Ma pîya bi belgeyanê ci rayapêroyîye rê pare kerd ke dewleta tirke pê çekanê kîmyewîyan hêrişa kena la rixmê naye vera nê hêrişan veng nêvejîyeno. Dezgehê mîyanneteweyî yê eleqedarî bêveng ê. Ma veng danê şarê xo ke wayîrê gerîlayan vejîyê. Ganî kurdî û dostê înan vera sûcanê dewleta tirke wirzê payan ser. Herême de şer dewam keno. Dewleta tirke nika Boxaza, Banista, Şehîd Dilgeş, Şehîd Serdar de ca dayo xo. Eynî wextî erazî de zî ge eşkera û ge-ge nimite têgêrenê. Beno ke no zimistan şer dewam bikero. Dişmen wazeno ke ver bi Qela Bedewê û Cîloya Biçûkî aver şiro. Coka beno ke şerd o xurtêr bo.''

Malazgîrtî derheqê tay xebaran zûran ê dewleta tirke de nê vatî: ''Dewleta tirke  waranê Kartal, Şehîd Dîren, Stûnê, Şehîd Aliyî de operasyon dabi destpêkerdene. Embazanê ma nê waran têkoşîno xurt da. Xoverdayîş hewteyêk dewam kerd û dewleta tirke derbeyê pîlî werdî. Vatişê medyaya tirke yê 'tîya zaf gerîlayî ameyî kiştene û zaf zî teslîm bîyî' raşt nîyo. Nê pêkewtişan de 5 embazê şehîd bîyî 4 embazê ma zî sey esîr kewtê destê dişmenî. Kartal de zî çeka kîmyewîye ameye şuxulnayene. Rixmê naye embazanê ma heta peynî xover da. Gazê ke tîya ameyî şuxulnayene sîstemê sînorî ser o tesîr kenê. Di embazê ma yê ke badê nê gazan hîşê înan ame ca seba ke destê dişmenî mekewê xo şehîd kerd. 3 embazê ma yê bînî hîrê rojî tunelanê şerî de xover danê la dima ra artêşa tirke bi tesîrê çekanê kîmyewîyan înan esîr gena. Şehîd Dîren de embazê ma Rûmet esîr kewno destê dişmenî û seba ke o teslîmê înan nêbîyo yeno şehîd kerdene. Dîmenê ke yenê parekerdene zî leteyêkê kayê leyminî yê medyaya şerê taybetî yê.''

Amed Malazgîrtî veng da dezgehanê mîyanneteweyî û vat: ''Ganî vera sûcanê ke artêşa tirke yê ke vera gerîlayan kena têbigêrê. Eke verê nê hêrişanê pê çekanê qedexeyan megîrê ê zî benê hemkarê nê sûcan. Ganî şarê kurdî dostê ci vera faşîmê AKP-MHPyî wirzê payan ser. No îqtîdaro faşîst yewna qeyde nêşino. No problem bi metodanê demokratîkan zî nîno çareserkerdene. Zîndanan de zî faşîzmo pîl esto. Bi serran o ma vera faşîzmî xover danê. Ganî her kes nayî vîno û vera nê îqtîdarê faşîstî şer bikero, çunke têna pê têkoşînî faşîzm eşkeno birijîyo.''