Fermandaranê Qerargehê Merkezê Pawitişê Şarî (MPŞ) ra Amez Malazgîrt tewrê bernameyê taybetî yê Stêrk TVyî bi û hêrişê dewleta tirke, xoverdayîşê gerîlayan û tewirê PDKyî ercnayî.

Qiseykerdişê Malazgîrtî ra beşêk wina yo:

''Dewleta tirke pê metodanê gemarinan şer kena û vana 'PKK qedîyayo.' Eke PKK qedîyayo kam ho şer keno? Amed, Dêrsim, Botan de gerîlayî çalakîyanê bitesîran kenê.Wa şarê ma bizano ke dewleta tirke vera gerîlayan teng menda xoka propagandaya reşkerdişî kena. Gerîlayî bi çalakîyanê bitesîran her roje danê artêşa tirke ro. 

Dewleta tirke paştdayîşê NATO û kurdanê xayînan ra nêbo nêeşkayêne hêrişê Başûrî bikera.La pratîk û teorîya înan seyci nêbîyî. Mîsal Zendûra de embazan rixmê ablûqa vera pêro teknîkanê artêşa tirke xo ver da. Embazan Mamreşo de zî pê ruhê PKKyî vera dişmenî şer kerd. Dişmen pê gerîlayan nêeşka coka pê gazanê kîmyewîyan peynî de embazê ma şehîd kerdî. Embazanê ma rayberîya embaz Serhed û Sarya de tîya de fedakarîyêka pîle mojnaye, derbê giranî dayî dişmenî ro. 7 embazê ma şehîd bîyî la ruho xoverdayox ê PKKyî ame îsbatkerdene.

Hetê bînî ra Werxelê de zî 7ê hezîrane ra nata xoverdayîşêko pîl yeno kerdene. Dewleta tirke pê pêro metodanê gemarinan û teknîkê xo hêrişan kena la embazê ma rixmê nînan zî danê dişmenî ro. Girê Sorî de rayberîya embazanê ma Botane û Zinarîne de xoverdayîşo pîl ame kerdene. Embazan nêverda dewleta tirke nêzdîyê tunelan biba. Dima înan pê gazê kîmyewî embazê ma şehîd kerdî. Girê Sorî de û Mamreşo de xoverdayîşê embazan dewam keno û şer ho vila beno. Embazî amadekarîyanê xo bi nê hawayî kenê.

Hêzê PDKyî xîret kenê ke warê ma teng bikerê û verê embazan bigêrê. Eke no têgêrayîş wina dewam bikero beno ke rewşê xirabî biqewimîyê. Eke ê raşta zî vanê ke ma vera înan hêrişêk plan kerdo ma amade yê ke bi mesuldarî têbigêrê. La eke ê verê embazanê ma gênê û hêrişê înan kenê û embazanê ma şehîd kenê hînî na rewşe bena sebebê şerî. Eke ê ma bigêrê binê ablûqa xora ma zî warê xo hîra kenê. Wa PDK paştî medo dişmenî, waştişê ma têna no yo. Eke PDK nê têgêrayîşî rê dewam bikero şarê kurdî bi temamî do bin bikewo.

Êyê ke vanê 'dewleta tirke vera PKKyî şer kena, PKK teng bîyo, ma çi vajê PKK do bikero' xo xapînenê, mîyanê şaşîtîye de yê. Ma zanenê ke şerê zereyî yê kurdan senî keyfê Tirkîya ano û senî zerar dano kurdan. Coka ma bi hîsgerî nêzdîyê mesele benê. Ma prosesêkê hîsgerî de yê. Ez venga pêro ciwananê kurdan dana ke tewrê gerîlayan bibê, semedê Kurdîstanê azadî têkoşîn bikerê.''