Fermandaranê Qerargehê Merkezî yê Pawitişê Şarî Amed Malazgîrtî ANF'yî reyde qisey kerd vat dewleta Tirkî vurîyaye bîye dewletêka çete.

Malazgîrtî qiseykerdişê xo de bale ante serê îşxalkarîya dewleta Tirkî ya serê Vakur û Rojakewtana Sûrîye û vist vîrî ke hêrişê dewleta Tirkî ya îşxalkare têna verba HPG'yî de ney, verba pêroyê Kurdan de yê.  Hêrişê verba Rojawanî destpêkê tayê hesabanê verba Mûsil û Kerkûkî de yê û vat, "Eke dewleta Tirkî Rojawan de ser bikewe û planê xo bîyare ca, o çax dor yeno nê cayan. Goreyê fikrê mi hayîya Kurdistanî pê naye esta. Destpêkerdişê hêrişê Rojawanî de pêroyê Kurdî yê çar parçeyan ra weriştî payan ser û tewirêk mojna."

Malazgîrtî va: ''Dewleta Tirkî gama ke hêrişê Kurdan kena û înan qir kena vana ‘Nê Kurdî nêyî PKK’yijê‘ bi nê vatişî wazena ke qirkerdişanê xo meşru ramojnê. Tim wina kena û kesêk zî vera ci reaksîyon nêda. Coka Faşîzmê AKP-MHP’yî naye ra cesaret girewt û dest bi operasyonanê neweyan kerd. Botan Colemêrg û Serhed de dest bi operasyonan kerd. Sey hêrişê vera gerîlayî ramot, la ma hol zanayêne ke peyê naye de planê bînî estî. Nê di serranê peyênan de hesabê înan deşîfre bîyî. Wazenê ke destkewteyanê Kurdan çîn bikerê.Coka bi heme hêzê xo hêrişê Kurdna kenê. Ma vanê dewlete la ê nika dewlete nêyî. Wasfêkê dewlete Tirkî nêmende.Tirkîya vurîyaye dewletêka çete ke DAÎŞ û El Nûsra ra yena meydan."