Dîlok de roniştişo  5. yê dewaya ke hemserek û îdarekarê HDP û DBPyî zî tede 90 sîyasetmedarî yenê muhakemekerdene  ke 10ê înan tepişte yê , vizêr Mehkemeya Cezaya Girane ya 2. ya Dîlokî de ame kerdene.

Maya Haştîye Dûrî Kaygusuza ke 18 mengî yo Zîndanê Tîpê Myî yê Êlih de yena tepiştene û cinîyê binameyê Guler Erat û Azîme Bali yê ke Zîndanê Dîlokî de yê pê sîstemê SEGBİSî tewrê mehkeme bîyî. 7 sîyasetmedarê bînî seba ke sîstemê SEGBİSî problemê vejîya tewrê roniştişî nêbîyî. Avûkatê tepişteyan û kesê ke bê tepiştişî yenê muhakemekerdene tewrê mehkeme bîyî. Reyna Wekîlê HDPyî Mahmut Tugrul û merdimê tepişteyan zî tewrê roniştişî bîyî.

Roniştiş de Maya Haştîye Dûrî Kaygusu bi rayîrê açarnayoxanê kurdkî pawitişê xo kerd. Dayîke Dûrî ard ziwan ke a xeylêk wexto tepişte ya û problemê weşîya ci zafêr bîyî. Dayîke Dûrî vat: ''Mi sûcêk nêkerd. Lajê mi grevê vêşanîye de bi. Ez senî eşkayêne cayê xo de vinderî.'' Kaygusuz sûcê ke ci rê benê red kerdî û beratê xo waşt.

Avûkata Dayîke Dûrî Bêrîvane Ozpolat zî vat: ''Muwekîla mi seba lajê xo tewra çalakîya roniştişî bîye, no sûc nîyo. Muwekîla mi de nêweşîyê giranî estê û ganî wextê tepiştişê ci zî verê çimî de bêro tepiştene û cade bêro verdayene.''

Sîyasetmedarê bînê ke tewrê roniştişî bîyî înan zî sûcê ke vera înan yenê kerdene red kerdî û tehlîyeya xo waşte.

Heyetê Mehkeme qerarê dewamê tepiştişê Dûrî Kaygusuz, Mehmet  Ozkan, Îsmaîl Berkpinar, Muslum Kiliç, Gulere Erat, Abdullah Ince, Azîme Balî, Cumalî Taşçi, Selman Tutumlu û Musa Aydinî da û roniştişo bîn 18ê hezîrane rê pey de eşt.