Wan de şaredarîyan de ke hetê qeyûman ra dest nîya ser nê rojanê peyênan de zaf kesî karî ra yenê vetene. Wekîla HDPyî Muazzeze Orhan vera naye nêrazîbîyayîşê xo mojna û vat: ''Destê xo kar û karkeran ra biancê.''
Weçînayîşê 31ê adare ra dima dest nîya şaredarîyanê Saray, Qelqelî, Mûradîye, Erdîş, Elbak û Rêya Armûşî û Şarederîya Pîle ya Wanî ser û înan rê qeyûm ame tayînkerdene. Naye ra dima ŞAredarîya Wabî de 7 karkerê bipeymanî, 8 karkerê taşeronî, Şaredarîya Rêya Armûşî de 90 karkerê taşeronî, Şaredarîya Qelqelîye de 28 karkerê taşeronî, Şaredarîya Erdîşî de 42 karkerî bi temamî 175 karkerî karî ra ameyî vetene.
Wekîla HDPyî ya Wanî Muazzeze Orhan vera naye nêrazîbîyayîşê xo mojna û vat: ''Îqtîdar karî ra vetişan binê nameyê 'têkoşînê vera terorî' de mojneno ke no nêno qebulkerdene. Kurdan rê kar, werde, cuye çin ê. Hîşmendîya qeyûmî na ya. Blokê AKP-MHPyî pê qeyûmî dest na îradeye şarî ser û nika zî pê karî ra vatişî xîret keno ke şar pê vêşanîye terbîye bikero. Vera nê hêrişan têkoşînê kede do dewam bikero. Destê xo karker û kedkaran ra biancê.''
