Hemserekê Komeleya Yewîye û Kulturî ya Paştdayîşê bi Keyeyanê ke Dergûşê Şaristanîye de Merdimê xo Vînî Kerdê (MEBYA-DER) ya Şirnexî Serhat Kuçukî derheqê kerdişanê serê cenazayanê gerîlayan de qisey kerd.

Kuçukî bale ante ser ke dewleta tirke semedê cenazayan keyeyan rê îşkence kena û vat: ''Xeylêk keyeyî semedê girewtişê cenazayan metropolanê Tirkîya û şaristananê Kurdîstanî ra yenê Şirnexî. Keyeyî yenê cenazayanê xo teşhîs kenê la cenaza nêdîyena înan û tira semedê testê DNA numûneya gonîye yena waştene. Testê DNA 10-15 rojan de eşkera beno. La Şirnez de bi 6-7 mengan eşkera nêbeno û keyeyî yenê vindarnayene. Wexto ke testî binetîce benê zî agahîye nêdîyena keyeyan. Dima cenaza bêşitiş û bêwecînbeyan goristanê bêkesan de yena definkerdene.''

Kuçukî ard ziwan ke keyeyî cenazayan teşhîs kenê la dewlete cenazayan reyna zî nêdana û vat: ''Xora hewn nêkeweno çimanê înan. Nê prosesê girewtişê cenazayan de keyeyî zaf dejenê. Ma keyeyan ra hetkarîye kenê. Mengan ra dima encax keyeyî cenazayan gênê. Destûr nêdîyeno ke keyeyî ra ber çew tewrê merasîmê definî zî mebo. Ê goreyê keyfê xo cenazayan rê îşkence kenê û danê definkerdene.''

Kuçukî da zanayene ke hewce nîyo ke keyeyî semedê testê DNA bêrê Şirnexî û eşkenê şaristananê xo de muracatê nêweşxaneyan û dozgerîye bikerê.