Meclîsê Şarî yê Kampa Multecîyan ê Şehîd Rûstem Cûdîyî, semedê tehlukeyê vîrusê Korona yê serê roniştoxanê kampe bi eşkerayîyêka çapemenîye venga dezgehanê mîyanneteweyîyan da ke hetkarîta kampe bikerê.

Destpêk de Hemserekê Meclîsê Şarî yê Demokratîkî yê Mexmûrî Hecî Kaçanî qisey kerd û bale ante rewşa hemwelatîyan a kampe ser û pare kerd ke kampe ser o tehlukeyêko pîl esto û venga dezgehanê berpirsîyaran da ke hetkarîya kempa bikerê.

Dima eşkerayîya Meclîsê Şarî hetê Hemsereka Şaredarîye Rojîne Îsiv ra ameye wendene. Rojîne bale ante tehlukeyê vîrusê Korona ser û vat: ''Wexto ke ma têkoşînê welatanê dinya yê vera vîrusî anê verê çimanê xo ma vînenê ke tehlukeyê kampa ma zêdêr û hesasêr o. Ma sey roniştoxan, meclîs û dezgehanê kampe goreyê îmkananê xo tay tebdîrî girewtî. Dibistane hetê dezgehê weşîye ra vurîyaye cayê karantîna la uca de zî îmkanê ma qîm nêkenê. Heta nika qet dezgehêk hetkarîya ma nêkerde û her ke şino îmkanê ma kêmîyenê. Hacetê xopawitişî û pakîye kenê ke biqedîyê.''

Tewr peyên Rojîne Îsiv venga dezgehanê herêmîyan, mîyanneteweyîya, dezgehanê weşîye, Neteweyanê Yewbîyayeyan, hukmatê Herêma Kurdîstanî û Iraqî da ke seba peydakerdişê hacetan ê tibîyan û xopawitişî, dermananê hewcedaran hetkarîya multecîyanê Mexmûrî bikerê.