Meclîsê Bajarî yê Kerkûkî derheqê hêrişanê bibombayî yê şewa Pancşeme yê Kerkûkî de eşkerayîyêka nuştekîye weşanaye. Eşkerayîye de ame vatene, amancê hêrişan afernayîşê fîtneyî yo. Tayê çimeyanê nêzdîyê PDK’yî zî Kurdan ra waşt ke bajarî ra vejîyê.
Bîlançoyê şeş hêrişanê bibombeyî yê kuçeyanê Şeraa Qûds û Bexda yê merkezê Kerkûkî girantir beno. Hûmara merdimanê ke cuya xo vîndî kerda bîye 7 kesî, 29 kesî zî bî birîndar.
Hemwelatijê Kerkûkî seba ke gonîye bidê birîndaran vernîya nêweşxaneyan de ameyî têhet. Cayê ke hêriş ameyo kerdene 10 wesayîtî bîyî xurda, bi desan keyeyan û karxaneyan xesaro madî dî. Goreyê xeylî der û doran, DAÎŞ berpirsîyarê nê hêrişan o, labelê hîna kesî berpirsîyarîye nêgirewte xo ser.
Meclîsê Bajarî yê Kerkûkî eşkerayîya xo de vatişê “hêrîşê terorîstî" bi kar ard. Eşkerayîye ame vatene, “Ma nê hêrişan bi hêrs şermezar kenê û mehkûm kenê. Menga Remazanî ya pîroze de hêrişê vera şarê ma yê sîvîlî nîşan danê ke terorîstî çiqas qilêrin ê, kovî û tersenok ê. Ma mîyanê bajarî û herêmanê der û dorê bajarî de tedbîrê xo yê asayîşî zêde kerdî.” Meclîsê Bajarî hîşyarîye daye ke bi nê hêrişan cehd kenê ke fîtne mîyanê şaran de biafernayê û da zanayene, ê do şarê Kerkûkî vera her tewir hêrişan biseveknê.
Çimeyê nêzdîyê PDK’yî bi rayîrê medyaya sosyale qisey vila kerdî û îdîa kerd ke DAÎŞ’î hêrişê Kerkûkî kerdo, do bikewo mîyanê Kerkûkî û artêşa Iraqî zî hêrişê keyeyanê Kurdan ê ke bajar de yê bikera. Balkêş o ke dimayê nê hêrişan ê ke Mesclîsê Şarî vat, ‘seba fîtneyî yê’, xeberê bi nê hawayî ameyê weşanayene.
