Komeleya Cigêrayîşî ya Ziwan û Kulturê Mezopotamya (MED-DER) panelê ''Doman û Ziwan'' kerd. Panel de Hemsereka MED-DERî Şîlane Elmas moderatorîye kerde. Pedagog Adar Jîyan, huqûqnase Cemîle Turhalli û akademîsyen Resul Geyîk zî sey qiseykerdoxî beşdarê panelî bîyî.

Panel de verî Şîlane Elmas Kan qisey kerd û ard ziwan ke domanê kurdî heqê perwerdeyî ra yenê dûrîvistene. Kane vat: ''Tirkîya de pê qirkerdişî kultur û ziwanê kurdan çin hesibîyenê. Semedo ke ma vera hêrişanê serê kurdkî tewirêkê xurtî nêmojnenê asîmîlasyon aver şino.''

Avûkate Cemîle Turhalli da zanayene ke goreyê peymananê mîyanneteweyîyan Tirkîya ganî heqê perwerdeyê bi ziwanê dayîke bida û vat: ''Tirkîya heqê ziwanê dayîke binpay kena. Heta ke ma ziwanê xo nêpawê ma do çin bibê. Ma semedê heqê perwerdeyê bi ziwanê dayîke isrardar ê. Ganî qanûnî goreyê ney bêrê kerdene.'' 

Resul Geyîkî vat: ''Eke perwerdeyê bi ziwanê dayîke nêno o ziwan hînî mireno. Domanê ke nêeşkê bi ziwanê dayîke xo îfade biikerê pê hişmendîya ziwanê serdesrî benê pîl. Domanî zêdêr wextê xo dibistanan de vîyarnenê coka ganî bi kurdkî perwerde bivînê.'' 

Pedagog Adar Jiyanî pare kerd ziwan sey dadîyêk o û vat: ''Psîkolojîya domanan ser o tesîrê ziwanî raşta raşte esto. Domanê ke nêeşkenê ziwanê xo yê dayîke hol bimusê nêeşkenê ziwanêkê bînî zî hol bimusê. Ziwan heqê ma nîyo hewcedarîya ma ya.''

Panel pê pers û cewaban qedîya.