MED TUHAD-FEDî derheqê hêriş û tedayanê vera tepişteyan de eşkerayîyêka nuştekîye daye.

Eşkerayîye de ame parekerdene ke vera tepişteyan teda û hêrişî zêdîyayî û ganî komel vera nê kerdişan vengê xo berz bikero.

Eşkerayîye de bale ameye antene ser ke wextanê peyênan de bi taybetî 3 û 4ê teşrîna verêne de Zîndanê Kirikkale ra tepişteyî surgunê zîndananê Tekîrdag, Kandira, Kiriklar, Sîlîvrî, Sîncan, Antalya ameyî kerdene. MED TUHAD-FEDî ard ziwan ke dewlete xîret kena ke pê surgunan tepişteyanê sîyasîyan bitersna.

MED TUHAD-FEDî vat: ''Pê polîtîkaya surgunî cezaya dîsîplînî zî zêdîyena û bi nê hawayî têkilîya tepişteyan a bi keyeyan birîyena. Zîndanan de tepişteyan rê wextê surgunî de cigêrayîşo rût yeno ferzkerdene û tepişteyê ke ney qebul nêkenê yenê derbkerdene.

Zîndananê Riha û Tarsûsî de gardîyanan eşt koxûşan ser û pê zorî koxûşê tepişteyan vurnayî. Wezaretê Edaletî îdîa kerd ke çîyo winasên nêqewimîyayo. Ganî ceza, îşkence, surgun, cigêrayîşo rût bêrê qedînayene, meseleyê tepişteyan bêrê çareserkerdene û tepişteyê nêweşî vera bidîyê. Ma venga pêro kesan danê ke na mesele de hîsger bibê.''