Hîkayeya nûştoxo Tirk Azîz Nesînî ya “Ne ciwîyeno ne zî nêciwîyeno” Wan de bîye raste. Mûrat Aladago ke Wan de ciwîyeno hewteyo ravêrte bi îdîaya “endamîya organîzasyonî” ame muhakemekerdene, dozgerî ci rê cezaya girane waşte. Aladago ke roniştişê ê ame taloqkerdene, dimayê roniştişî ra şi banka û waşt ke xo rê hesab akero. La selahîyetdaranê banka Aladagî ra vat o nêeşkeno hesab akero.

Aladagî gama ke sebebê ci persa, înan ê ra vat, “Qeydan de ti merde yê.” Aladagî seba ke vajo “ez ciwîyena” muracatê Îdareyê Nufûse kerd û seba ke nûşteyêk ke tede nûşto “o ciwîyeno” bigêro şi Îdareyê Nufûse yê Wanî. Ûca ê ra ame vatene ke “Seba rojanekerdişî problemî estê. Şima qeydan de merde asenê.”

Mudurîya Nufûsî ê ra waşt ke îspat bikero o ciwîyeno û naye ser Aladagî heme keyeyê xo berd nufûse û bi nê hawayî hayîdarîyê Aladagî ameyî newekerdene û ravêrtî qeydan.

Aladagî derheqê babete vat, "Hetêk ra mi rê 12 serrî ceza wazenê la banka zî mi ra vana ti merde yê. Ez ciwîyena yan merde ya wa qerarêk bidê. Ez do na babete de muracatê sazîyanê huqûqî bikerî.”