Sîyasetmedarê namdarî yê Başûrê Kurdîstanî û dostê Rayberê Şarê Kurdî Abdullah Ocalanî Dr. Mehmûd Osmanî serrgêra 22. ya Komployê Mîyanneteweyî de ANFyî reyde qisey kerd.

Dr. Osmanî bale anye gamanê yewînan ê Komployê Mîyanneteweyî ser û vat: ''Armancanê verênan ê komployî ra yew zî no bi ke Ocalan wa Sûrîye ra bêro vetene. Ocalanî nêwaştêne Sûrîye de meseleyêke biqewimîya coka komêka embazanê xo reyde tira vejîya. Dima planê komployî yo ke DYA serkêşîya ci kerdêne, dest pêkerd. Axir peynî de Ocalan Tirkîya rê ame teslîmkerdene. Amerîka serkêşîya komployî kerde, reyna Îsraîl û Tirkîya zî mîyanê planî de bîyî. Ewropa zî tede kes nêeşka vera Amerîka vengê xo vejo. Heyf ke komplo o çax ser kewt û Ocalan ame tepiştene.''

Mehmûd Osmanî derheqê dişmenîya Tirkîya ya vera kurdan de wina vat: ''Tirkîya dişmena Ocalan, kurdan, pêro Kurdîstan û PKKyî ya. Ocalan warê haştîye de hol zanîyeno. Na rewşe zorê Tirkîya şina. Înan waşt ke Ocalan vera PKKyî bêro vindartene, îdareyê Qendîlî xira bikero. Coka hêrişê Rojawan û Başûrî kerd. Tecrîdê vera Ocalanî goreyê qanûnanê Tirkîya zî raşt nîyo. Terefgîrê Ocalan û PKKyî her cayê dinya de û Kurdîstan de estê. Eke Tirkîya menfaatanê xo biwaştêne Ocalan azad kerdêne. Çunke Ocalan seba haştîye xebitîyeno û dîyalogan rê amade yo. La heyf ke Tirkîya şer wazena. ''Bi azadîya Ocalanî yan zî dîyalogê şarî no şer eşkeno biqedo. La heyf ke Tirkîya û hemkarê ci yê bazirganî şer wazenê. Tirkîya kurdan kena terorîst. La terorîst ê yê. Kurdî têna xo pawenê. Eke Tirkîya bieşka PKK çin bikera do hêrişê PDK û YNKyî zî bikera.''