Rewşa Îstîsnayîye her çiqas şaristananê Tirkîya de qedîyaye zî şaristananê Kurdîstanî de yena dewamkerdene. Rewşa Îstîsnasyîye ra heqê merdiman yenê binpaykerdene.

Hemserekê Şûbeyê Wanî yê Komeleya Heqanê Merdiman (ÎHD) Murat Meletî ard ziwan ke hem Tirkîya de hem zî Rojhelatê Mîyanênî de heqê merdimî yenê binpaykerdene. Melekî vat: "Bi wesîleya Hewteyê Heqanê Merdiman ma veng danê ke Beyannameyê Unîversalî yê Heqanê Merdiman xo rê sey esas bigêrê. Eke no krîter bêro ca hînî ma eşkenê qala estbîyayîşê heqanê merdiman bikê. Naye ra ma venga terefgîranê heqanê merdiman û demokrasîyî danê ke biçêrî bibê. Eke şima biçêr bibê ma eşkenê binpaykerdişê heqanê merdiman biqedînê. Wina nêbo na dewlete her tim heqanê merdiman binpay kena."

Meletî îfade kerd ke Rewşa Îstîsnayîye dewam kena û vat: "Avûkatê heqanê merdiman nêeşkenê çalakîyan de şar reyde bivejîyê meydanan. Sere de Wan pêro Kurdîstan û Tirkîya de ganî qedexeyî bêrê wedaritene. Astengîyê seba çalakîyan, nawnayîşan bêrê wedaritenê. Ma do qet heq û raştîye ra şaş nêbê. Nika bi hezar merdimî seba fikranê xo tepişte yê. Bi hezaran merdimî zî qedexeyan ra teber de seke zindan de yê ciwîyenê."