Îdareyê Xoserî yê Şingalî eşkera kerd ke şorişgêrê 43 serran ê Têgêrayîşê Azadîye yê Kurdîstanî  Menal Mêrdîn 2ê çeleyî de Tilezêrê Şingalî de pê suîkastê xayînî yê dewleta tirke û PDKyî şehîd bîyo.

Eşkerayîye de ame vatene ke Menal Mêrdînî têkoşînê xo yê 43 serran de semedê şaranê Kurdîstan û Rojhelatê Mîyanênî keda pîle daye û rixmo ke 20 serrê xo zîndananê dewleta tirke de ravêrnayî çirey verê zulmî de milê xo çewt nêkerd.

Eşkerayîye de ca dîya nînan: ''Hemrayê ma Menal Mêrdînî badê fermanî verê xo da Şingalî û waştêne derheqê fermananê vera êzidîyan de kitabêk binuso. Badê xebata xo ya Serdestî verê xo da Tilezêrî. 2ê çeleyê 2023yî de raştê hêrişê xayînî ame. No suîkast pê destê MÎTê tirkî û PDKyî ame kerdene. Dewleta tirke ya îşxalkere û PDK seba ke şar amegêro Şingalî tim hêrişan kenê. Tewr peynî de 100 keyeyî agêraybî Tilezêrî. Şar agêreno ça ûca raştê hêrişî yeno. Wa dewleta tirke û PDK hole bizanê ke ê sekenê wa bikerê nêeşkenê ma rê çok bidê dayene. Ma do hesabê nê fermanî şima ra bipersê. Ma do hesabê şehîdkerdişê Menal Mêrdînî şima ra bipersê. Şarê êzîdî dost û dişmenanê xo hole nas keno. Senî ke dostê êzidîyan wayîrê Şingalî vejîyayî ma zî wayîrê înan vejîyenê.

Seba ke ma hêrsê xo yê vera nê hêrişî ramojnê, ma do 5ê çeleyê 2023yî de saete 13.30 de rayraşîyayîşêk bikerê.''