Keyeyanê tepişteyanê nêweşan û ê tepişteyanê ke înfazê înan ameyo vêşnayene roja 268. ya Nobeta Edaletî de verê Edlîyeya Amedî de eşkerayîye daye.

Hemsereka HDPyî ya Amedî Gulîstane Atasoy, DBP, MED-DER, MEBYA-DER û TUAY-DERî zî paştî daye çalakîye.

Merdimanê tepişteyan ra Reşad Ada çalakîye de îfade kerd ke cewan nêdîyeno waştiş û muracatanê înan û vat: ''Wa tepişteyê nêweşî bêrê veradayene. Ma do her roje edaletî biwazê. Heta ke tepişteyî azad bibê ma do têkoşînê xo rê dewam bikerê.''

Dima merdimanê tepişteyan ra Încîye Guler qisey kerd û vat: ''Zîndanan de zulm beno giranêr. Faturaya ney keyeyî danê. Ma do nê zulmî qebul nêkenê. Ganî qanûnî seba her kesî seyci bibê. Seba ke ma kurd ê nê çîyî ma rê kenê. ''

Çalakîye bi sloganê 'Biciwîyo xoverdayîşê zîndanan' qedîyaye.