Mabênê dewa Şêba Jêrî ya Dêrikî û dewa Şêbî ya Şemrexî de 17ê kanûne de şer qewimîya. Hêrişan ra dima tîmanê taybetan ê artêşa tirke keso ke rîyê ci girewte bi xo de berd dewe û bi nê hawayî 8 kesî destbend kerdî.

Sercan Dolek, Vedat Belgîn, Halîl Belgîn, Nezîr Demîr, Bedrettîn Ozge, Aydin Ozdorak, Sînan Daniş û Ahmet Yapici yê ke 7 rojî  nezaret de mendî ameyî berdene bi Edlîyeya Mehkeme. Dozgerîye bi şertê kontrolê edlîyî ê vera dayî û erşawitî mehkema û dima zîdewijî ameyî veradayene. 8 kesanê ke ameybî destbendkerdene vat tîman îşkence  înan rê  kerd û ê tehdît kerdî . Nê 8 kesan nêweşxane ra raporê derbî waşt la rapor nêame dayene. Wexto ke destbendkerde bîyî leşkeran bi daran da înan ro. Ame îfadekerdene ke avûkatê înan do gerre bikê. Dewijê ke ameyî veradayene seba ke gerre bikê şîyî Amed, Weqfa Heqanê Merdiman a Tirkîya (TÎHV).

4 cenazeyê ke 17ê kanûne de şer de wefat kerd ameyî erşawitene Morgê Nêweşxaneyê Dewlete yê Mêrdînî. Cenazeya Servet Demîrî hetê keyeyê ci ra ameye girewtene û Êlih de ameye definkerdene. Ame vatene ke 3 cenazeyê bînî seba ke nasnameyê înan eşkera nêbîyî hema zî morg de yê.