Fermandarîya Qerargehê Merkezê Pawitişê Şarî(MPŞ)  derheqê Hewteyê Qehremanîye yê Neteweyî de eşkerayîye daye û nê vatî:

''Qehremanê şarêkî est ê ke wexto ke xoserîye û azadîya ci hewce kena vejîyenê werte. Nê qehremanî bi cesaret û qerardarîye dewaya azadîye ya şarêkî genê xo ser û rolê xo yê tarîxî kay kenê. Serkêşîya nê qehremanan de hêzê têkoşînî û nasnameyê o şarî yeno pêardene. Xeylê qehremanê kurdan zî est ê ke bi xoverdayîşê xo yê destankî nameyê xo tarîx de dayo nuştene. Nê qehremanan mezgê şarê kurdî de cayê xo birewt û bi dengbej, klam, sanikan ziwan ra ziwanî vila bîyî.

Mîlîtananê Apoyî ke prosesê Qehremanîya Neteweyî ya Hemdemî da destpêkerdene bi PKKyî nîm seserre têkoşîn kerd. Nê prosesê tarîxîyî de bi hezaran qehremanan semedê pawitişê estbîyayîş  û azadîya şarê ma xo feda kerd. Fedayîyo verên ê têkoşînê ma Rayber Apoyo ke 27 serrî yo sîstemê îşkenceyî yê Îmraliyî de xover dano û heta ewro rayberîya têkoşînê ma keno, fedayîyo verên û qehremano tewr pîl yê têkoşînê ma yo ma ey bi hesret, heskerdiş û hurmetî selam kenê.

Şarê kurdî mabênê hewteyê çalakîya Kawayê Modernî Mazlûm Doganî ya 21ê adare û roja şehadetê Fermandar Egîd-Mahsum Korkmazî sey Hewteyê Qehremanîye fîraz keno. Hemra Mazlûm Doganî bi tewirê xo yê Zîndanê Amedî ruhê xoverdayîşî û rotaya PKKyî tayîn kerd. Hemra Egîdî zî no ruh û rota kiriştî koyanê Kurdîstanî, gerîlatîye daye destpêkerdene  tewirê şerê fedayî vet meydan. Hemrayî Mazlûm û Egîd bîyî sembol, ruh û xeta tarîxê azadîya Kurdîstanî û qehremanê şarî yê neteweyî. Ma şexsê qehremananê xo Mazlûm û Egîdî de şehîdanê xo yê ezîzan bi hurmetî yad kenê. Na çarçewe de ma Hewteyê Qehremanîye yê şarê xo yê welatperwerî û hemrayanê xo ke têkoşînê azadîye her ca de domnenê, fîraz kenê.

Têkoşînê ma yê gerîlayan ke bi guleyê verênî yê fermandarê ma yê bêmergî hemra Egîdî dest pê kerd, ewro bîyo artêşa Apoyîyan ê fedayîyan. Gerîlayanê Azadîye yê Kurdîstanî  têkoşînê xo yê 41 serran de bi gonîya şehîdan serkewtişê xo îspat kerd. Gerîlayê Azadîye yê Kurdîstanî do ewro ra tepîya zî semedê azadîya Rayber Apoyî, pawitişê estbîyayîşê şarê kurdî wezîfeyê xopawitişê meşrûyî bikerê. Ma do bi hêzê ke qehremananê xo ra genê têkoşînê xo girdêr bikerê. Ma reyna Hewteyê Qehremanîye fîraz kenê, têkoşînê azadîye de serkewtiş wazenê.''