23ê sibate de merkezê ci şaristanê Xoyî yê Kurdîstanî de erdlerzêk qewimîya û tesîrê qezaya Elbakî ya Wanî zî kerd. Taxanê Elbisî, Eleze, Qiratî, Xanikî û Qaşqolî yê Elbakî de texrîbatêko pîl ame meydan. Şarê Elbakî  îfade kerd ke  semedo ke hewa zaf serd û awe kewena xeyman nêeşkenê xeyman de bimanê.

Mexdûra erdlerzî Menîce Aslan vat: ''Semedo ke vewre hêlîyena xeyme mîyanê çamurî de manena. Awa pake çin a. Ca çin o ke ma robar bikerê. Destê ma ra çîyêk nêno, ma coka xeyman de manenê. Ganî cade çareyêke bêra dîyene.''

Zûlîfe Aslan vat: ''Ma nêeşkenê kincanê xo bişuwê û robar bikerê. Xeymeyêke de ma 6 tenî manenê.''

Murvete Aslan vat: ''Ganî cade hetkarîya ma bêra kerdene. Domanê ma robar nêkenê, bîyî perîşan.''

Edîbe Yilmaz zî ard ziwan ke pêro heywanê înan binê erdlerzî de mendî û vat: ''Domanê mi nêweş ê. Bi 20 rojan o ke domananê mi robar nêkerd. Lajê mi nêweş o la ez nêeşkena ey bera nêweşxane. Îran peyê ma de yo ke tede Korona esta. Gereka ma wextêkê winasênî de bala xo bidêne hîjyen ser. La no mumkîn nîyo.''