Roniştoxanê Kampa Multecîyan a Şehîd Rûstem Cûdîyî (Mexmûr) vera hêrişanê çekanê kîmyewîyan ê dewleta tirke ya îşxalkere çalakîyêka rayraşîyayîşî kerde.

Çalakîya rayraşîyayîşî de bêmabên sloganê 'biciwîyo xoverdayîşê gerîlayan', 'şehîdî nêmirenî', 'Biciwîyo Serek Apo', 'bimiro îxanet' ameyî vatene û fotografê Rayberê Şarê Kurdî Abdullah Ocalanî ameyî akerdene. Girseyî çalakîye ra dima verê bînaya Neteweyanê Yewbîyayeyan de eşkerayîye daye.

Eşkerayîye ra verî seba 17 gerîlayanê ke hêrişanê kîmyewîyan de şehîd bîyê deqayêkê rêzgirewtişî ame girewtene.

Eşkerayîye de ame vatene ke dewleta tirke ya îşxalkere pê çekanê kîmyewîyan gerîlayan qetil kena û venga Neteweyanê Yewbîyayeyan ame dayene ke wa nê hêrişan ser o cigêrayîşî bikerê.

Eşkerayîye bi sloganan qedîyaye.