Wesayîtanê Hewayî yê Biçeke Bêmerdimî  (SÎHA) yê dewleta tirke ya îşxalkere vizêr saete 13:10 de Kampa Mexmûrî daye bombayan ver.

Bombarduman de 2 cinîyê ciwanî cayê serebûtî de şehîd bîyî û înan ra yewe zî bi giranî birîndar bîye. Ambargoyî ra û nêbîyayîşê hacetan ê hewcedaran ra cinîya birîndare gonîrijnayîşî ra şehîd bîye.

Heyetê Iraqî serebûtî ra dima cigêrayîş kerd û nêweşxane de zî cigêrayîşê xo kerd dima agêra. Roniştoxê kampe rixmê tehlukeyê nêweşîya vîrusê Korona zî seba ke cenazayan defin bikerê verê nêweşxaneyî de kom bîyî. Caardişê wezîfeyê dînî ra dima cenazayê cinîyan ê şehîdan hetê roniştoxanê kampe ra pê mersîmêk ameyî definkerdene.

Merasîmî ra dima nameyê Meclîsê Şarî yê Demokratîkî ser o Nurane Sezgîn eşkerayîyêke daye. Sezgîne hêrişê dewleta tirke, bêvengîya Neteweyanê Yewbîyayeyan, Hukmatê Iraqî û Hukmatê Herêma Kurdîstanî şermezar kerd. Sezgîne îfade kerd ke no hêriş têna vera Mexmûrî nê vera pêro kurdan o. Sezgîne venga dezgehanê kurdan, şarî da ke cade yewîya neteweyîye bîyarê ca.

Eşkerayîye pê sloganê ''Şehîdî nêmirenî, Biciwîyo Serek Apo'' qedîyaye.

6ê kanûna 2017î, 13ê kanûna 2018î û 19ê temmuza 2019î de zî teyarayanê dewleta tirke ya îşxalkere Kampa Mexmûrî ser o bombayî varnabî.