Badê qewimîyayîşê restorantê Huqqabazî ke tede mesuldarê MÎT’î Osman Kose ame kiştene ra nata Mexmûrî ser o ambargoyê vejîyayîş û dekewtişî dewam keno.

Dimayo ke 17’ê Temmuze de restorantê Huqqabazî ya Hewlêrî de endamê MÎT’ê Tirkî Osman Kose ke dewlete o sey dîplomat ramot ame kiştene, Kampa Koçberan Şehîd Rustem Cûdîyî ya Mexmûrî ser o qedexeyê vejîyayîş û dekewtişî ame bicaardene. Mengêk ravêrte hema dekewtiş û vejîyayîşê kampe qedexe yê. Ambargoyo ke semedê wendakaran û xebatkaran bi sebebê zordarîye merg zî ard. Fatma Kara û Zeynep Ehmede yê ke diganî bî bisebebo ke destûr nêdîya şirê Nêweşxaneyê Hewlêrî dergûşê xo vînî kerdî. Rixmê heme pêvînayîşanê Meclîsê Şarî yê Mexmûrî û Komîteya Karanê Teberî ambargo hema dewam keno.

Endamê Komîteya Dîplomasî Bêwar Ûnvero ke ANF’yî rê qisey kerd vat:’’ Ma rîsipîyanê cimatî ra heyetêk pêard ke derheqê ambargo de pêvînayîşan virazî. Nê heyetî bi qeymeqamê Mexmûr û asayîşê PDK’yî pêvînayîş viraştî. Bado zî hetê Meclîsê Şarî û Komîteya Dîplomasî ra heyetêk ame pêardene. Nê heyetî zî bi parlamenteranê Herêma Kurdistanî û Iraqî pêvînayîş viraştî. Reyna bi Têgêrayîşê Goranî, Têgêrayîşê Nesîlo Newe,  Yekgirtu û Komeleya Îslamî  zî pêvînayîşî ameyî viraştene. Berpirsîyaranê kampe nê caardişê bihuqûqîyî yê vera kampe kiriştî wareyê mîyanneteweyîyî zî. Rixmê heme pêvînayîşan ambargo dewam keno. Berpisîyaranê PDK’yî ma rê rayîrê dîplomasî qefilnayî. Ma fam nêkenê ke PDK nê ambargoyî qey bica ano la ganî ê goreyê huqûqî tê bigêrê, tewr tay destûrê ravêrtîşî bidê nêweşan, karkeran û wendekaran.’’