Mucahît Yilmazo ke  21’ê Temmuze de sereştişê keyeyan ê qezaya Baglarî ya Amedî de ame qetilkerdene, 28 rojî yo  meyîtê ci nêdîyeno keyeyê ci.Sereştişî ra saetan ra dima Wezîrîya Karanê Zereyî nasnameyê Yilmazî eşkera kerdbi û îdîa kerdbi ke ‘o mensûbê rêxistino û wareyê bejahîye ra semedê faalîyetan ameyo.’

Meyîtê Mucahît Yilmazî yo ke ame kiştene Morgê Nêweşxaneyê Perwerde û Cigêrayîşî yê Amedî de hetê  ferdanê keyeyê Yilmazî ra ame teşhîskerdene. Rixmo ke nasnameyê ey ameyo eşkerakerdene û heme muracatanê keyeyê ci meyîtê ey teslîmê merdimanê ci nêbeno. Keyeyê Yilmazî vizêr reyna semedê girewtişê meyîtê lajê xo muracatê Serdozgerîya Komare ya Amedî  kerd la înan ra ame vatene ke dozger îzîn de yo.  Keye reyna dest veng agêra Qoser.

Bi seyan cenazeyî bitaybetî yê ke demê hêrişanê qirkerdişî de ameyî qetilkerdene Mêrdîn, Riha, Erzirom, Dîlok, Amed û Semsûr de goristanê bêkesan de yenê pawetene. Meletî yo ke Sazgehê Tipê Edlî ûca yo tewr tay 170 meyîtî goristanê bêkesan de ameyî definkerdene  û nêdîyenê keyeyanê înan. Rayna dewa Oleka Corî ya girêdayîyê merkezê Bedlîsî de meyîtê 267 kesan ra yê 265 kesan 19’ê Kanûne 2017’î ra nata Sazîya Tibê Edlî ya Stenbolî de yenê girewtene.