Dewleta tirke sey caardişêkê şerê taybetî îşkenceyê vera cenazayan rê dewam kena û cenazayanê gerîlayan nêdana keyeyanê înan.

Cenazaya gerîlayê HPGyî Agît Îpeko ke 23ê gulana 2017î de şehîd bibi û cenazaya Mahsum Aslano ke 2ê tebaxa 2021î de şehîd bibi pê kargoyî erşawîyabî keyeyanê înan.

 Gerîlayê HPGyî Senar Delayîmîlan (Brûsk Deyndar) û Zîndan Yenî (Dijwar Şerzan) 8ê êlule de nêzdîyê dewa Pirêjmanî ya qezaya Pîranî ya Amedî de bombardumanê artêşa tirke ya îşxalkere de şehîd bîyî. Selahîyetdaran keyeyê Yenîyî rê telefon kerd la bi bahaneya ''Sebebê mergê ci eşkera nîyo'' cenaza nêdaye keyeyî. Keyeyê Yenîyî seba ke cenaza bigêro Dezgehê Tipê Edlî (ATK) yê Îstanbulî ra xebere paweno.

Dadîya Zîndan Yenîyî Menîce Yenî derheqê babete de Jinnewsî rê qisey kerd.  Menîce da zanayene ke şehadetê lajê ci ra 62 rojî dima xebere dîyaye û înan cade muracatê Serdozgerîya Komare ya Pîranî kerdo. Menîce vat: ''Serdozgerîye verî vat ke ma eşkenê siba cenaza bigêrê. La key mêrdeyê mi reyna şi înan vat beno ke serrêke yan zî mengêke dima cenaza bidê. Înan vat parçeyê ke cenaza ra mendê erşawîyayî ATK, parçeyê bînî zî vêşaye yê. Dima ke ma israr kerd katibê dozgerî vat 'Beno ke cenaza pê kargoyî bierşawîya şima.' 

Lajê mi ra negûyêk zî mendo ez do ey bigêra. Cara înan domanê ma qetil kerdî, hînî ma ra çita wazenê? Ma do têkoşînê lajê xo ra fek vera medê. Menga vîyarte de polîsan lajê min ê bînî rê telefon kerd û tira waşt ke wa şoro verê bînaya HDPyî de ronişo. Lajê mi vato 'Şima birayê mi qetil kerd, cenazaya ci nêdanê.' Ma esteyanê domananê xo wazenê. Domanê ma pê madeyanê kîmyewîyan qetil benê coka cenazayî nêdîyenê. ''

Dayîke Menîce bale ante nobeta Berê Sêmalka û vat: ''Dewleta tirke ma rê se kena Barzanî zî ê keyeyan rê heman çî keno. Esteyanê domananê ma zî nêdanê. Her roje domanê kurdî yenê qetilkerdene.''