Endamê Komîteya Rayberdişî ya PKKyî Murat Karayilanî bi wesîleya serrgêra Xoverdayîşê Rojeyê Mergî yê Pîlî yê 14ê Temmuze meqaleyêke nuşte. Meqaleya Karayilanî ra tay noqtayê girîngî wina yê:

''Her çî ra ver ez serrgêra 41. de xoverdayoxanê serkêşan ê Rojeyê Mergî yê Pîlî yê 14ê Temmuze M. Hayrî Durmuş, Kemal Pîr, Akîf Yilmaz û Alî Çîçekî bi rêz û minetî yad kena. Verê vîrameyîşê înan de ez rîyê xo bi rêzî ana ca û soz dana ke ma do xeta înan de heta peynî şorê û wayîrê vîrameyîşê înan vejîyê.

Xoverdayîşê Rojeyê Mergî yê Pîlî yê 14ê Temmuze gandarbîyayîşê tewirê îdeolojîk-felsefî yê Rayber Apoyî yo. Komelê Kurdîstanî ameyêne qirkerdene. Rayber Apoyî vera ney gamêke eşte. Nê tewirê Rayberê ma, nê ruhî û xorinbîyayîş ê ke dayê kome kadroyê bingeyînî awan kerdî. Têgêrayîşê Apogîrî bi tewirê xo prosesê partîbîyayîş da destpêkerdene. Raştîya nê tewirî bi Hakî Karerî dest pêkerd, bi Mazlûm Doganî resa zîndanî,  Ferhat Kûrtay, Mahmût Zengîn, Eşref Anyik û Necmî Onerî nê tewirî rê dewam kerd. Çalakîya Ferhatan ra dima M. Hayrî Durmuş persa vat 'Ma se bikerê Kemal?' Kemal Pîrî vat 'Ganî ma gonîya xo birijnê.' Bi nê hawayî tewiro fedatî ame mojnayene. Coka Xoverdayîşê 14ê Temmuze xoverdayîşo tarîxî yo. Nê tewirî serkewtiş mojna.

Tewirê heybetînî yo ke Hakîyan ra heta Mazlûman û Xoverdayîşê 14ê Temmuze aferîyayo, mujdeyê serkewtişê PKKyî da. Embaz Hayrî, Kemal û Mazlûm bi pratîkê xo bîyî paştgîrê Rayber Apoyî. Zîndanê Amedî de înan bi çalakîya xo ya tarîxîye paştdayîşo tewr pîl da Rayberîye. 

12ê Êlula 1982yî de Cuntaya Faşîste ya 12ê Êlule Tirkîya û Kurdîstan de serdestîya xo îlan kerde û pêro welatî ra bêvengîya mergî ferz kerdbî. La qîrayîşê Xoverdayîşê Zîndanê Amedî ruho fedayî yê 14ê Temmuze bi. Nê ruhî pêro kadro û semptîzananê partîye de hîsê 'fedakarîye û têgêrayîşî' viraşt. Coka Xoverdayîşê 14ê Temmuze bi çimeyo tewr pîl.

Mîrazê awankerdişê gerîlayan û têgêrayîşê gerîlayan no ruhê xoverdayîşî bi. O çax kadroyê ma pê xerîta û pusulayan kewtî rayîr. Nika Kurdîstan de rêçê gerîlayan şinasîyeno la o çax zehmet bi. Xîretanê îdeolojîkan ê Rayberîye û ruhê Xoverdayîşê Zîndanê Amedî bingeyê ney amade kerd û perspektîfê 'Ma senî eşkenê zehmetîyan werte ra wedarnê' pêşkêş kerd. Bi nê hawayî bingeyê Hemleya 15ê Tebaxe ame eştene. Bêguman mîyanê gerîlayan de ruho fedayî û xofedakerdişî teyna qîm nêkeno. Eke hetê ney de afernayîşê taktîkan çin bo nêbeno. 

Gerîlayî teyna vera hêzanî dişmenî ney vera îxanetê zereyî, vera hêrişanê xeta ajanîye, vera hêrişanê Komployê Mîyanneteweyî zî xo ver danê. Bingeyê ney zî bi xoverdayîşê 14ê Temmuze gandar bîyo. Bêguman hêzê gerîlayan o bingeyîn îdeolojîya Apogîr a. 

Seke zanîyeno DAÎŞî 2014 de hêrişê xeylêk cayan kerd û pêro dinya ra bîyo gef. Teyna ruhê fedayî yê apogîran, gerîlayî eşkeyî verê DAÎŞî bigêrê. Ruhê xoverdayîşî yê pîlî ra nêbîyêne mumkîn nêbîyêne ke DAÎŞ biameyêne vindarnayene. Wexto ke serkewtişê winayênî yenê ercnayene averşîyayîşê gerîlayan ê bi ruhê 14ê Temmuze zî eşkera beno.

Seke zanîyeno ke dewleta tirke bi destekê NATOyî û hemkarîya PDKyî vera Herêmanê Pawitişî yê Medya hêrişî dayî destpêkerdene. Hêverî sibata 2021î de ame waştene ke Garê de warê Qerargehê Merkezî bêro destvistene. Dima hêrişê vera Zap, Avaşîn û Metîna dîyayî destpêkerdene. Xoverdayîşê Zapî de ruhê 14ê Temmuze resa asta tewr pîle. Bêguman no ruh teyna Zap de net pêro eyaletanê Vakurê Kurdîstanî de est o. 

Ewro  şer dewam keno. La dewleta tirke û artêşa ci rixmê mutefîqanê xo û teknolojî û çekanê qedexekerdeyan zî bênetîce mendî. Raunto diyîn dewam keno. Bêguman gerîlayî do rauntê diyînî de ser bikewê. Xora gerîlayî bêkêmasî û çar bi çarî nîyê. La artêşa gerîlayan  bi raştî zî çarçewa 14ê Temmuze de fedayîbîyayîşî de resayê astêke. 

Asta nikayêne de gerîlayan bi têkoşînê xo yê seba şarê Kurdîstanî, şarê Tirkîya û şaranê herême, bi têkoşînê vera qirkerdişî netîceyê pîlî vistî destî. Gerîlayî do dewrê verê ma de zî bi rolêkê girîngî têbigêrê. Ruho fedayî yo Apogîr ê 14ê Temmuze yo ke gerîlayî paştî tira gênê do serkewtişanê pîlan bivisno destî.''