Mîtîngê Platformê Demokrasîyî û Kede yê Amedî yo ke bi şîarê waştişê haştîya komelkîye û cuyêka başêre ame serûberkerdene, dest pêkerd. Polîsan destûr nêda ke çalakîya vera şerî de pankarta vera şerî bêra kiriştene.
Mîtîngî Platformê Demokrasîyî û Kede yê Amedî bi slogana ''Seba haştîya komelkîye û cuyêka başêre ma demokraî înşa bikê'' ame destpêkerdene.
Mîtîng Meydanê Îstayonî de dest pêkerd û Konfederasyonê Sendîkayanê Kedkaran ê Umûmî (KESK), Kenfederasyonê Sendîkayanê Karkeran ê Şorişgêran (DÎSK), Odaya Yewîya Mîmaran û Muhendîsan ê Tirkan (TMMOB) û Yewîya Tabîbanê Tirkan (TTB) rayberîya nawnayîşî kerde.
Meydanê nawnayîşî bi pankartanê kurdkî û tirkî ame xemilnayene. Polîsan destûr nêda ke pankartê bi nuşteyê ''Bi qeyûman, îxracan şima nêeşkenê ma bêveng bikê'', ''Vera Şerî Haştîye'' û ''Ma do nêverdê ke butçeyê şarî pêşkêşê şerî bibo'' bêrê kiriştene.
Meydanê nawnayîşî de pankartê bi nuşteyê ''Ma do binê îqtîdarê heremîyan bigêrê'', ''Ziwanê ma rûmetê ma yo'', ''Bi KHKyan nêeşkenê rûmet û îradeyê ma xesp bikê'' ameyî daliqnayene.
Mîtîng de sloganê ''Biciwîyo Xoberdayîşê Rojawanî, biciwîyo xoverdayîşê karkeran'' ameyî vatene. 14 şaristananê bînan ra zî zaf kesî tewrê nawnayîşî bîyî. Hemserekê Partîya Herêman ê Demokratîkan (DBP) Salîha Aydenîz û Keskîn Bayindir zî tewrê nawnayîşî bîyî.
