Dimayo ke hemsereka KCD’yî Leyla Guvene 8’ê Teşrîna Peyêne de zîndanê Amedî de seba wedartişê tecrîdê serê Rayberê Şarê Kurdî Abdullah Ocalanî dest bi grevê vêşanîye kerd ra 13 rojî dima, yanî 21’ê Teşrîna Peyêne de Temsîlkarîya HDP’yî ya Hewlêrî de dest bi grevê vêşanîye yê bêdem-bêagêrayîşî kerd. Serê çalakîya grevê vêşanîye ya Leyla Guvene ra 143 rojî, yê Nasir Yagizî ra zî 130 rojî ravêrtî.

Roja ewilêne ya Nasir Yagizî ra nata endama Temsîlkarîya HDP’yî ya Hewlêrî Mizgîn Arî zî ke sîyasetmedarêka qedexekerde ya verê Nasirî de manena. A manaya zîndan û grevanê vêşanîye rind zana.

Arî serra 2012 de xoverdayîşê grevê vêşanîye yo ke zîndanê Amedî de 68 rojî dewam kerdibi de Sêvê Demîre û Besîme Konca dir pîya tede ca girewtibi. Ê wextî de Leyla Guvene dir heman koxuşe de mendêne. Arî qalê çîyanê ke grevê vêşanîye yê bêdem-bêagêrayîş ê Nasir Yagizî 130 rojî verî ra dest pêkerdibi kerd.

Mizgîn Arî ard vîrî dimayo ke Leyla Guvene grevê vêşanîye da destpêkerdene ra nata Temsîlkarîya HDP’yî ya Hewlêrî de zî înan bi tewrbîyayîşê grûban çalakîyê paştîdayîşî dayê destpêkerdene.

Gilangê Qerarê Nasir Yagizî Yê Destpêkerdişê Bi Grevê Vêşanîye...

Arî ard ziwan ke Nasir Yagizî zereyê grûba ewilêne de ca girewto û derheqê prosesê qerarê grevê vêşanîye yê bêdem-bêagêrayîşî yê Nasir Yagizî de nê vatî:

“Embaz Nasir Yagiz tewrê grûba ewilêne ya grûba bêdem û biagêrayîşî bi. Gama ke tewrê grûba ewilêne bi ma ra nêvat ke o do bikewo yê bêdem-bêagêrayîşî. Roja dîyine vat ke o wazeno bibo hemrayê embaze Leyla, wazeno ke çalakîya ke hetê aye ra ameyo destpêkerdene rê bibo cewab. Grûba ewilêne qedîyaye. Waşt ke dewam bikero. Biisrar vat, ‘mi qerarê xo rew ra dayo. Ez do bi hawayêkê bêdem û bêagêrayîşî bidî dewamkerdene.’ Vat sirf seba naye ê hewteyêk o ke wer nêwerdo, hendî qerarê xo de bîyo net û wazeno ke bido dewamkerdene. Bêvindertiş ma rê qalê sebebê çira wazeno çalakîya xo rê dewam bikero kerdêne. Vatêne tecrîdo ke hemverê Rayberîya ma de yeno bicaardene se beno bibo bi hawayêk ganî bêro şikitene, vatêne naye ra ez qerarê xo de net a, hewteyêk o ez xo ceribnena û ez îradeyê xo ra bawer kena.

Embaz Nasirî hetê xo ra qerarê xo dabi. Seba ceribnayîşî vero ke tewrê grûba ewilêne bibo qasê hewteyêk wer nêwerdibi, waştişê xo ma dir pare kerdêne û dereceya qerardarîya xo ramotêne. Bêvindertiş ma ra vatêne ke embaze Leyla roja ewilêne ra bîya nete, o zî wazeno ke nê prosesî rê wina bibo cewab, vatêne o cigêrayîşî mîyan de yo ke waye Leyla rê bibo hemra.  Dimayo ke ê qerarê xo bi ma da hesnayene ma munaqeşeyî kerdî. Prosesê nê munaqeşeyan de heta grûba dîyine ma eşkerayîyêk nêdaye. “Embaz Nasir Yagiz tewrê grûba ewilêne ya grûba bêdem û biagêrayîşî bi. Embaz Nasirî gama ke vatêne ganî çalakîya waye Leyla ke seba wedartişê tecrîdo ke şexsê Rayberîye de şarê ma ser o yeno bicaardene dayo destpêkerdene bêro xurtkerdene û dima ra vatêne, ‘Na lazimîyêk a ke ma çalakîya waye Leyla bikerê xurt û bibê embazê Rayberîye û Leyla, bibê hemrayê cinî.’  Dima ra zî wina pabestêne, ‘Ez wazena seba vengdayîşê embaze Leyla yê semedê wedartişê tecrîdî bibî cewab û hemrayîya cinî dir bibî yew.’

Gama ke embaz Nasirî ma ra vat ke o do çalakîya xo açarno bêdem-bêagêrayîşî ma waştêne ê fam bikerê û ma 4 rojî ê dir na babete ser o munaqeşe kerd. Ê munaqeşeyanê ke çar rojî dewam kerdî de ma dî ke o zaf qerardar o, embazî verî ra qerarê xo dayo û çew nêeşkeno bi ci game peyde bido eştene, naye ra ma zî bi eşkerayîyêka çapemenî îlan kerd.”

Arî proseso dimayên wina qal kerd: “Tim bi lazimîya hemrayîya waye Leyla vatêne ke ganî ê bibê xelqeya teberî ya na hemrayîye. Vatêne, ‘Heta nika temamê çalakîyan rê zîndanî serkêşî kerda, la seba wedaritişê tecrîdî proses hendî ma ra wazeno ke ma xelqeyêka çalakîye ya winayêne teber de zî virazê.  Na çalakîya ke hemverê tecrîdî de bi serkêşîya cinî zîndan de dest pêkerda ganî ma teber de hîna bikerê xurt.  Heta nika ma timî mesuldarîye eşta doşê zîndanî ser, seba ke nê çalakîyî biresê amacê xo ganî nê çalakîyî zîndanan ra heta heme wareyanê teberî vila bibê û ma xelqeyêk dormeyê Rayberîye de hemverê tecrîdî de virazê.’ Û timî vatêne, ‘Ez zaf qerardar a çunke ez wazena ke bibî hemrayê waye Leyla.’

Xelqeya Xoverdayîşî

Arî bale ante ke nê grevê vêşanîye yê peyênî dewamêkê rojeyê mergî yê zîndanan ê serranê 1980’an ê û nê vatî: “Xoverdayîşê têgêrayîşê Azadîya Kurdan hendî bîyo mîrasêk ke vizêr ra resayo bi ewro.  Rîpelê tarîxî bi Xeyrî, Kemal, Akîf û Alîyanê ke bîbî sembolê xoverdayîşî ramojneno ma ke qîrayîşê azadîye her dewrî de newe ra zîl danê. Xoverdayîşê zîndanî ke 14’ê Temmuze de dest pêkerdibi veng da vengê ê kesanê ke cuye ra qaso ke seba ci bimirê hes kerdêne û xoverdayîşê ê hemrayan 82’yan ra heta ewro bi hawayêkê tewr biîhtîşamî heta ewro dewam kerd.  Nê xoverdayîşî zîndanan de tayê dewran de newe ra zîl da. Tewr peynî xoverdayîşo ke 2012 de menga Êlule de dest pêkerdibi û 68 rojî dewam kerdibi seba dayîşqebûlkerdişê nê waştişan bi. Grevê vêşanîye yê bêdem-bêagêrayîşî yê ke hetê waye Leyla ra ameyî destpêkerdene û embazê ma Nasir 130 rojî yo domneno xelqeyêka nê xoverdayîşî yê. No xoverdayîşê ke bi slogana ‘Ma tecrîdî bişiknê, Kurdistanî azad bikerê’ dest pêkerdibi bi qerardarîye dewam keno.”

Problemê Weşîye

Arî ya ke problemê weşîye yê Nasir Yagizî zî ardî ziwan nê vatî:  “Nasir her roje bi hawayêkê hîna bihêz û bi moralêkê hîna berzî qerarê xo keno newe. Hetê fîzîkkîyî ra ê dir zehmetîyanê cidîyan xo ramot. Problemê ê yê weşîye her roja ke şina hîna benê giran. Ancax hetê qerardarîye ra her roje newe ra xo resneno rehendêkê hîna corî. Waye Leyla ra û embazanê ke çar perçeyê welatî de û dinya de kewtê grevê vêşanîye, înan ra hêz gêno. Dejê ci rîyê ê de xo ramojnenê. La rixmo ke weşîya ci xirab a zî xo vera nêdano.  Her roje dejanê wucûdê xo dir yeno têrî. Hemverê dejan de û wucûdê xo de mîyanê şerî de yo û çalakîya xo domneno.”

Arî qiseykerdişê xo wina qedîna: “Gama ke her roje verê çimanê şima de yew lete bi lete helêno no hetê hîsdarîye ra zehmet o. La ez nê halî rê zaf xerîb nêya. No hal her çend hetê hîsî ra zor bido ma zî qerardarî û îradeyê embazî ma rê zî moral dano. Rixmo ke çalakîya xo de kewto roja 130’ine moral û coşê xo ra çîyêk nêkerdo kemî. Eksê ci de her roje moral û coşê ci hîna beno berz. Çunke bawer keno ke çar perçeyanê Kurdistanî de û teberê welatî de vilabîyayîşê grevê vêşanîye ramojneno ke na çalakî ver bi resayîşê amacê xo şina.”