Hemşaredarê Amedî Selçuk Mizrakli dima ke wezîfeyê xo ra ame girewtene îfadeyê îtîrafkere Hîcran Berna Ayverdî ser o bi îdîaya ''endamîya rêxistine'' bi waştişê cezaya zîndanî yê 7 serrî û 6 menge ra heta 15 serre ame tepiştene. Roniştişo verên ê dewaya Mizrakliyî Mehkemeya Cezaya Girane ya Amedî de ame dîyene.

Mizrakli bi rayîrê SEGBÎSî beşdarê mehkeme bi. Mehkeme de avûkatê Mizrakliyî Serekê Baroyê Amedî Cîhan Aydin, Mehmet Emîn Erdogan û Zulale Erdogan amade bîyî. Roniştiş ra verî dormeyê edlîye de tedbîrê asayîşî yê giranî ameyî girewtene. Hemserekê KCDyî Bedran Ozturk, Hemsereka DBPyî Salîha Aydenîz , wekîlê HDPyî û îdarekarê HDPyî yê Amedî, Serekê CHPyî yê Amedî Mehmet Sayin, Wekîlê Partîya Saadetî Cîhangîr Îslam, Sereko Pêroyî yê KKPyî Sînan Çîftyurek, Endamê Partîya Kede Yusuf Karataş û zaf temsîlkarê dezgehanê sivîlan tewrê roniştişî bîyî. Pawitişan ra dima heyetê mehkeme bire daye ke rewşa tepişteyî ya Mizrakliyî dewam bika. Roniştiş taloqê 10ê sibate ame kerdene.