Fermandarîya Qerargehê Merkezê Pawitişê Şarî (MPŞ) derheqê hêrişanê kîmyewîyan ê dewleta tirke ya îşxalkere de eşkerayîyêke daye. Eşkerayîye wina ya:

''Wezîrê Şerî yê Tirkî Hulusî Akar verê rayaumûmîye de bi dirîtîyêka pîle têgêra. Nêzdîyê dewa Sîda ya bajarekê Şêladizê ya Amedîyê de 7, 8 û 9ê kanûne de vera çeperanê xoverdayîşî yê gerîlayan hîrê rojan 150 reyî çekê kîmyewîyî şuxilnayî. Fermanê nê hêrişan hetê Hulusî Akarî ra dîya. Keso ke fermanê nê hêrişan dayo, bêşerm 9ê kanûne de Meclîsê Tirkîya de kombîyayîşê budçe de verê komelî de qiseyê ke eqsê kerdişanê ci yê vatî. Qiseyê xo yê verênî reyna dibare kerdî û îdîa kerd ke înan çeka kîmyewîye nêşuxilnaya û bêşerm vat ke înan bi xo heyetêk awan kerdo, heyetî herême de Wezîrîya Weşîye reyde cigêrayîş kerdo. Nê şexsê bêşermî verê komel û rayaumûmîya Tirkîya de zûrî kerdî. Ey hem fermanê çekanê kîmyewîyan dayo hem zî bêşerm no înkar kerdo.

Raporêkê cigêrayîşî yê serê hêrişanê kîmyewîyan yo ke goreyê qiseyanê nê kesî yo, qetî objektîf nêbeno. O bi xo sûcdarê şerî yo, bi raporan xîret keno ke xo pakî bikero. Qiseyo ke heyetêkî viraşto û şawito, heman wextî de îtîrafê sûcanê xo yê şerî yo. Coka raporo ke ey qala ci kerda, nêno qebulkerdene û bawerkerdene. Ê hêzanê ke çekê kîmyewîyî şuxilnayê, pêro vat ke qetî çekê kîmyewîyî nêşuxilnayê û sûcê şerî nêkerdo. Şarê ma yê Başûrî şuxilnayîşê çekanê kîmyewîyan ê rejîmê Saddamî ra Helebçe de bi hezaran cinî, doman, ciwan û kokimî şehîd dayî. La Saddam Huseyînî rixmo ke verê çimanê dinya de no kerd vat ke înan çeka kîmyewîye nêşuxilnaya. Coka ganî çew pê zûranê Akarî bawer nêkero.

Cayê çeperanê ma yê şerî hê uca de yê ke mîyanê 3 rojan de 150 reyî çekê kîmyewîyî tede şuxilîyayî. No ca cayêko winayên o ke rayîrê asfaltînî resenê ci. Coka bi wesayîtî merdim eşkeno xo biresno na herême û tede cigêrayîş bikero. Ma venga heyetanê xoseran danê ke na herême de cigêrayîşî bikerê û raştîyan bivînê.''