10ê adare wextê peydabîyayîşê vîrusê Korona ra nata Tirkîya de 75 kesî merdî. Labelê 300 hezar kesê ke zîndananê Tirkîya de tepişte û hukmwerde yê rewşêka bitehluke de yê. Hukmatê AKPyî goş nêdano vengdayîşan. Zîndanê Wanî de bi hawayêkê fermîyî nêro parekerdene zî yeno vatene ke tepişteyêk pê vîrusê Korona kewt.

Hukmato ke seba veradayîşê tecawuzkeran, rotoxanê kundoxan xîret keno babeta tepişteyan ê sîyasîyan de bi vatişê ''sûcê terorî'' rayaumûmîye xapîneno.

Wekîla HDPyî ya Wanî Muazzeze Orhan derheqê babete de qisey kerd û vat ke şert û mercê zîndananê Tirkîya û Kurdîstanî seba cuya merdiman weş nîyî.

Muazzeze Orhan bale ante meseleya awe û werdî yê zîndanan ser û vat: ''Serê kapasîteya zîndanan de tepişteyî û hukmwerdeyî estê. Na meseleyêka cidî ya. Bi pakîye ganî merdimî xo vîrusî ra bipawê la zîndanan de nê îmkanî çin ê. Eke vîrus bikewo zîndanan beno semedê mergê merdiman. Hukmatê AKP-MHPyî her kaos xo rê keno sey firsendêk.''

Muazzeze Orhan pare kerd ke îqtîdarê AKP-MHPyî her keso ke bêhuqûqîye, bêtêdûştîye û qirkerdişan ano ziwan sey terorîst pênase keno. 

Muazzeze Orhan vat: ''Ma derheqê na babete de tîya de zî xebatan kenê, xîret kenê.  Ma di rojî verê cû waşt ke îdareyê zîndanî reyde pêvînayîş bikerê la îdareyê zîndanî randevu nêda ma. Vat ke meseleyêke yan zî nêweşî çin ê. Labelê zanayîşê ke zîndanî ra yenê wina nîyê. Ma babete nêzdî ra teqîb kenê. Cuya tepişteyan û hukmwerdeyan rewşêka bitehluke de ya.''