Meclîsê Xoserîya Demokratîke ya Şingalî (MXDŞ) bi eşkerayîyêka nuştekîye hêrişê kîmyewîyî yê dewleta tirke ya îşxalkere şermezar kerdî.

Eşkerayîye de ame vîrvistene ke artêşa tirke ya îşxalkere 14ê nîsana 2022yî ra nata hêrişê Zap, Metîna û Avaşînî kena û nê şeş mengan de 2500 reyî çekê kîmyewîyî û bombayê qedexekerdeyî şuxilnayê. Eşkerayîye de ame vatene ke 2 menganê peyênan de zî 17 gerîlayî hêrişanê kîmyewîyan de bi hawayêkê barbarî ameyê qetilkerdene.

MXDŞyî eşkerayîye de pare kerd ke dezgehê mîyanneteweyî vera nê hêrişan vengê xo nêvejenê û gerîlayî bi hawayêkê xurtî xoverdayîşî rê dewam kenê. MXDŞyî ard ziwan ke hêzê PDKyî nêverdenê ke heyetê xoserî cayanê hêrişan de cigêrayîş bikerê û bi nê hawayî PDK beno hemkarê nê hêrişanê dewleta tirke ya îşxalkere.

MXDŞyî vat: ''Ma hêrişanê vera gerîlayan sey hêrişanê vera pêro merdimîye û bi taybetî sey  hêrişanê vera êzidîyan vînenê. Çunke gerîlayî seba azadîye xo ver danê, ê pawitoxê rûmetê merdimîye yê û înan xo resnabî hewarê şarê ma. Ewro zî mesuldarîya ma ya ke ma verê hêrişanê kîmyewîyan bigêrê. Ma venga pêro êzidîyan danê ke sûcanê şerî yê dewleta tirke teşhîr bikerê, Şingalî ra heta Ewropa bi yewvengî vera nê hêrişan têbigêrê.

Sere de Neteweyê Yewbîyayeyî ma venga pêro dezgehan û hêzanê mîyanneteweyîyan danê ke sûcanê dewleta tirke vindarnê, waranê hêrişanê dewleta tirke de cigêrayîşan bikerê. Wa dewleta Iraqî vera nê hêrişan erkê xo bikera.

Ma sey êzidîyan tim hetê gerîlayan de yê û seba ke verê nê hêrişanê qirkerdişî bigêrê ma do bi pêro hêzê xo têbigêrê.''