Meclîsê Xoserîya Demokratîke ya Şingalî (MXDŞ) derheqê hêrişanê Iraqî yê vera Şingalî de eşkerayîyêke daye. Hêze Asayîşê Êzidxanî, rêxistinê komelê sivîlî, PADÊ-TAJÊ, alîmê dînî û temsîlkarê şarê erebî zî tewrê eşkerayîye bîyî.

Endamê Heyetê Îdareyî yê Şingalî Azad Huseyînî eşkerayîye wende.

Eşkerayîye de ame parekerdene ke dewleta tirke PDKyî reyde hêrişê Başûrî kena û hukmatê Iraqî zî 18ê nîsane de hêrişê noqtaya asayîşî yê Şingalî kerd. Huseyînî vat: ''Artêşa Iraqî waşt ke şerêkê dergî û pîlî bida destpêkerdene. La seba ke ma verê şarê Iraqî de xo mesuldar hîs gênê, ma wina nêkerd. Ma wazenê ke wa hukmatê Iraqî eşkera bikero ke nameyê kamî ser o hêrişê ma kerdo? Ma wextê fermanê DAÎŞî de hem xo hem zî şarê Iraqî pawitbi. Ewro çira Iraq çekanê xo anceno domananê ma ser? Iraq do bibo parçeyê fermanî?

Nê hêrişî dewamê Peymana 9ê Teşrîna Verêne yê. La ma xo ver danê, qetî sereyê xo nêanê war. Hukmatê Iraqî zî sey PDK û Tirkîya êzidîyan rê dişmenîye keno. Dewleta tirke wazena Nînova, Şingal û Kerkûk Iraqî ra bigêra. Ma venga Iraqî danê ke wa hêrişanê dewleta tirke û PDKyî vindarnê. Çew nêeşkeno îradeyê ma bişikno. Ma sozê Şingalê Xoserî dayo û ma do nê sozî bîyarê ca. Wa pêro dinya de êzidîyî vera nê hêrişan têbigêrê, plananê dewleta tirke û PDKyî vindarnê. Ma soz danê ke bi îtîfaq, yewîye û xoverdayîşî Şingalê Xoserî awan bikerê.''