Endama Merkezê Cigêrayîşanê Jineolojî, rojnamegere û akademîsyene Nagîhane Akarsela ke Silêmanî de hetê dewleta tirke ra amebî qetilkerdene, hetê Dibistana Hunerî ya Silêmanî ra serkêşîya cinîyanê Başûrî de ameye yadkerdene. Xeylêk cinîyê aktîvîst, sîyasetmedar û endamê rêxistinan tewrê merasîmî bîyî.

Vervatoxa Înîsîyatîfê 'Cinîyî Îşxalî rê Pawenê' Şoxane Mîrza merasîm de qisey kerd û vat: ''Cinîyê Başûrê Kurdîstanî wazenê ke xebata Nagîhane Akarsel hîra bikerê û bi ruhê enerjîya aye verê şîdetê serê cinîyan bigêrê. Ma hukmatê Herêma Kurdîstanî ra wazenê ke azadîya cinîyan bîyaro ca, rayîr medo terorî.''

Endama Akademîya Jineolojî Necîbe Qerejdaxî vat: ''Hêrişê vera Nagîhane hêrişêko namerd bi. Seba ke a ameye qetilkerdene vengê 'jin, jiyan, azadî' vila bi. Ganî qetilkerdişê Nagîhane peynîya cîyabîyayîşê cinîyan bîyaro.''

Sekretera Yewîya Cinîyanê Kurdîstanî Kefîye Silêman vat: ''Nagîhane bi destekê tarî 40 rojî verî ameye qetilkerdene. Ma nê tarîgeran rê vanê ke karwanê xebate û azadîye yê cinîyan do dewam bikero.''

Qiseykerdişan ra dima derheqê Akarsele de sînevîzyonêk ame mojnayene.