Sey her cayê Tirkîya û Kurdistanî, Dêrsim de zî şar saetanê şewdirî ra nat şono sindoqan ser û rayanê xo erzeno ci.  Merkezê Dêrsimî de 22 hezar û 600 weçînayoxî estê û 97 sindoqî ameyê ronayene.

Muşahîd û wezîfedaranê sindoqan ê HDP’yî şewdir saet 5 de şîyî sindoqan ser û dest bi wezîfeyê xo kerd.

Rêxistinê HDP’yî yê Bajarê Dêrsimî de yew heyet o ke 10 kesan ra ameyo ronayene zî do weçînayîşî teqîb bikero. Reyna Koordînasyonê Krîzî yê Yewîya Hêzî ya Şorişgêre ya Dêrsimî sindoq bi sindoq gêreno û derheqê weçînayîşî de beyanatan gêno.

Baroya Dêrsimî zî Merkezê Teqîbkerdişê Ewlehîya Weçînayîşî nayo ro û bi no qeyde weçînayîşî teqîb kena. Heto bîn ra Fransa ra yew heyet o 5 kesîn, seba teqîbkerdişê weçînayîşî ame Dêrsim.

Namzedanê Hemserekîya Şaredarîya Dêrsimî ra Nurşat Yeşîle Lîseya Anadoluye ya Meslekîye ya Ataturkî de, Hidir Demîrî zî Lîseya Fenî ya Turk Telekomî de rayê xo eştî û endaman waşt ke weçînayîş bi hawayê ewlehîye bêro temamkerdene û welat û Dêrsimî rê bixeyr bo.