Merkezê Îrtîbatî û Çapemenîye yê HPGyî nasnameyê 3 şehîdanê Heftanînî eşkera kerdî. Eşkerayîye wina ya:

''11ê sibata 2022yî de herêma Heftanînî de hêrişanê artêşa tirke ya îşxalkere de embazê ma Ronî, Mazlûm û Qendîl şehîd bîyî. Nê embazê ma seba azadîya şarê xo tewrê gerîlayan bîyî û pê tewrbîyayîşê xo bîyî milîtanê Apogîrî yê mîsalî. Ma soz danê ke heta ke xeyalanê nê embazanê xo yê çêran bîyarê ca bi bêemanî têkoşînê xo rê dewam bikerê.

Nasnameyê embazanê ma yê şehîdan wina yê:

Embazê ma Ronî şaristanê Bane yê Rojhelatê Kurdîstanî de dadîya xo ra beno. Embaz Ronî 2016 de tewrê gerîlayan beno û perwerde ra dima derbazê Heftanînî beno. Embaz Ronî seba caardişê paradîgmaya Rayber Apoyî zaf xîret keno. Embaz Ronî Heftanîn de zî giranîye dano perwerdeyan ser û wextê hêrişanê artêşa îşxalkere de derbanê giranan dano piro. Embaz Ronîyo ke mîyanê tîmanê hereketînan de ca girewtêne, serkêşîya çalakîyanê serkewteyan keno. O tim beno çimeyê moral û coşê embazanê xo.

Embaz Mazlûm Qamişlo de dadîya xo ra beno. Embaz Mazlûm verî mîyanê xebatanê Şorişê Rojawanî de ca gêno û tîya de partîya ma nêzdî ra şinasneno. Embaz Mazlûm dima 2017 de verê xo dano koyan. Embaz Mazlûm tim keno ke taktîkanê dewrê neweyî bîyaro ca û bibo gerîlayêko profesyonel. Embaz Mazlûm 2020 de derbazê Heftanînî beno û mîyanê çalakîyan de bi hawayêkê aktîfî ca gêno. Embaz Mazlûm nê çalakîyan de rolê xo yê serkêşîye bi hawayêkê serkewteyî ano ca.

Embaz Qendîl Reqa de dadîya xo ra beno. Embaz Qendîl verî vera hêrişanê DAÎŞî têkoşîn keno û dima zî wextê îşxalê Efrînî de, 2018 de verê xo dano koyanê azadan. Embaz Qendîl mîyanê gerîlayan de xo aver beno û 2019 de derbazê Heftanînî beno. Heftanîn de embaz Qendîl tecrubeyanê girîngan visneno dest û beno milîtanêko marîfetîn. Embaz Qendîlo ke mîyanê tîmanê hereketînan de ca gêno, heta nefesê xo yê peyênî têkoşîn keno.

Ma sere de keyeyanê ercîyayeyan ê embazanê xo yê şehîdan rê, pêro şarê welatperwerî yê Kurdîstanî rê serweşîye wazenê.''