Qezaya Sîlopî yê Şirnexî de cinîyî bi coşêkê pîlî meydanê nawnayîşê 8ê Adare de ameyî pêser. Cinîyî bi kincan, pankartan û waştişanê xo meydanê nawnayîşê 8ê Adare kerd pirr.

Qezaya Sîlopî ya Şirnexî de bi seyan cinîyî tewrê nawnayîşê 8ê Adare Roja Cinîyan ê Kedkaran a dinya benê,  cinîyî bi kincan, pankartan û sloganan ver bi meydanê nawnayîşî şinê. Nawnayîş hetê Têgêrayîşê Azadîye yê Cinîyan (TJA) û Meclîsê Cinîyan ê HDPyî ra Sîlopî de ame serûberkerdene û bi deqayêkê rêzgirewtişî dest pêkerd. Nawnayîşî meydanê Parka Newroze de bi sloganê ''Ma xoverdayîş rêxistin kenê, ver bi azadîye şinê'' û ''8ê Adare fîraz bo'' dayîya destpêkerdene.

Bi seyan cinîyî Şirnex, Hezex, taxanê Sîlopî, Cizîrî ra ameyî meydanê nawnayîşî. Cinîyan kincê Botanî dayî xo. Dekewtişê Silopî de polisan cinîyî vindertî. Cinîyî noqtayanê polîsan ra bi zilgitan, sloganan derbazê meydanê nawnayîşî bîyî, înan govend girewt.

Hemsereka KCDyî Leyla Guven nawnayîşê Sîlopî de qisey kerd û îfade kerd ke seba Dayîka Taybete, cinîyanê ke Sîlopî û Qirkerdişî Parisî de ameyî qetilkerdene wina vat: ''Ma ewro bi coşêkê pîlî tîya de yê, ma bihêzêr ê. Ewro pêro dinya qala têkoşînê cinîyanê kurdan kena. Ma ewro meydanan de yê. Ê nêeşkenê bi kiştişî îradeyê ma bişiknê. Cinîyê kurdî sînoran nas nêkenê. Cinîyê kurdan koledarîye qebul nêkenê. Nika cografyaya ma de tecrîd esto. Wazenê vengê kurdan şexsê Ocalanî de qut bikerê. No xîret veng o. Ma vanê eke şima haştîyêke mende wazenê berê Îmraliyî abikerê. Ganî Birêz Ocalan azad bo.

No tewrbîyayîş hêzê cinîyan, îradeyê cinîyan mojneno. Ma meydanê  8ê Adare de serkewtişê xo xurtêr bikerê. ''